P全球【世界台】Trump政府ê露西亞政策跤步亂

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語,就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

美國對露西亞(Russia)ê政策tsit-má亂操操,國家安全顧問Michael Flynn落台ê事件,牽涉著 Donald Trump總統佮伊ê人馬,凡勢koh有和露西亞ê秘密來往,猶未煏空。加上外交、國防首長佮總統無仝調,連本底真佮意Trump ê露西亞,看起來mā開始緊張矣。

 

佇Trump當選後、就任前,內定做國家安全顧問ê Flynn佮露國駐美國大使講電話,討論著Obama政府對露國ê制裁。私人進行國家ê外交,是違法ê。代誌正月中開始uì情報機關漏洩出來予媒體。Flynn 頭先koh否認,後來漸漸,伊佇2月13辭職。

 

Flynn ê代誌猶未煞。到底Trump ê競選抑是執政團隊,佮露西亞koh有深ê牽連、總統本人知影無?情報單位猶咧查。另外一方面,Trump譴責漏洩情報是犯罪行為。總統和情報界繼續鬥法。

 

Trump對露西亞友善,批判盟邦,自競選期間就予政策界誠煩惱。伊捌講北大西洋公約組織(NATO)已經「過時」。毋過頂禮拜,國務卿Rex Tillerson佮國防部長James Mattis分別佇歐洲講出予歐洲盟邦較放心ê話。

 

Tillerson講,美國若欲和露西亞合作,kan-na佇符合美國佮盟邦ê利益ê時,才有可能,包括露西亞愛遵守Ukraine ê和平協議。Mattis講美國全力支持北約,並且目前無欲和露西亞進行軍事上ê合作。這兩位,tsit-má予外界看做Trump政府內底較清醒ê重要官員。

 

根據報導,以上ê種種事件,雖然露西亞政府無正式做特別ê評論,但是至少佇媒體佮民間,若像對Trump政府ê熱情期待烏有去,誠不滿。一份官方報紙講,白宮最近關於外交政策,包括對露西亞政策ê講法,互相矛盾。

 

Koh-khah基本ê問題是:準做無最近遮的發展,Trump想欲佮露西亞合作ê按算,也無可靠。經濟學人週刊分析,雙方ê利益差傷遠矣,比論佇Syria,Trump講欲消滅Islam國,露西亞總統Vladimir Putin喙裡講相siāng ê目標,實際上是欲透過支持Syria總統Bashar al-Assad,永遠佇中東駐軍。

 

文章講,美國聯合露西亞,來對付中國,mā是無實際ê想法。露西亞比中國弱太濟,商業利益佮政治價值koh佮後者相倚,Putin袂想欲去得失北京。

 

特色圖片:已經落台的美國前國家安全顧問Michael Flynn – Defense Intelligence Agency website,公有領域,連結

 

 

【世界台】Facebook專頁

您可以 留言回應, 或 追蹤

留言