P全球【世界台】退出巴黎協定  表現Trump式單爿主義

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語就懂八九成了。還有聲音檔唸給你聽,許多字詞也超連結到《臺灣閩南語常用詞辭典》。看世界新聞兼學台語文,就是【世界台 ~ Sè-kài Tâi】啦!

巴黎氣候協定ê減碳目標是袂束縛ê(non-binding),是按怎美國Trump政府猶是欲退出咧?有分析者講,伊主要是為著國內政治,這mā反映伊強烈ê單主義。

 

Donald Trump總統6月初1宣佈美國欲退出巴黎協定,講這个協定對美國無公平,會傷害美國ê經濟佮頭路。但是伊koh講有意思欲重談判,爭取較好ê條件。至少伊無像往過,講氣候變化是騙局。

 

學者佮前政府官員連署聲明共伊反駁,指出巴黎協定無要求具體ê政策,排碳減量ê目標也無法律拘束力,「若是總統真正認為美國ê目標困難,會使共調整就好」,規个退出,根本是一个無必要ê動作。

 

《金融時報》ê一篇分析講,Trump就任以來無通過重要ê立法,這陣koh拄著下司暗通露西亞ê歹看代。伊用這个動作,會當對伊ê支持者宣稱勝利,表示伊有影「共美國第一」。

 

進前,外界認為極右派ê白宮首席策士Steve Bannon已經失勢矣,Trump敢若開始行較溫和ê路線。毋過這改,主張退出巴黎協定ê Bannon看起來又koh得勢矣。

 

川普今年3月在密歇根州 Ypsilanti 美國移動中心演說,背景是「購買美國貨、雇用美國人」政見標語。 (Shealah Craighead的白宮官方照片,via Flickr,公共領域

這篇文章講,雖然大部份ê美國人關心氣候變化,毋過真tsē人無認為這是優先議題。照正月ê一份民調,民主黨員有超過六成認為這是優先的議題,共和黨員卻kan-na有15%。

 

退出巴黎協定,毋但牽涉氣候議題,《金融時報》ê社論講,Trump這个決定是「刁工破壞多爿行動ê原則」。

 

5月底,佇Trump結束歐洲訪問行程ê時,伊ê國家安全顧問H.R. McMaster佮首席經濟顧問Gary Cohn聯名發表一篇文章,宣稱Trump政府猶原重視盟邦,請in莫緊張。

 

毋過,Trump ê實際表現,包括毋肯明講支持北大西洋公約ê集體防衛義務,連這兩位較受外界信任ê官員,mā真替伊妝,這篇文章予人批評有真tsē矛盾。比論in講,世界毋是一个「全球社區」,是一个競賽場,所有ê國家、非政府組織佮企業佇內底相爭利益。美國對朋友,只要是利益相仝,就會當合作;面對敵人,美國會保護家己ê利益佮價值,毋過mā希望會著有共同利益ê所在來合作。

 

《大西洋》雜誌ê一篇評論質疑,若按呢,「朋友」ê意思是啥物?這種完全隨人顧性命ê國際觀,毋是民主盟邦長久以來接受美國領導ê理由。按呢ê美國,就佮Trump本人仝款,自私、壓霸,kan-na追求眼前ê好處,不管理想佮長期ê利益。

 

川普6月1日在白宮玫瑰園宣布美國退出巴黎協定。 (Joyce N. Boghosian的白宮官方照片,via Flickr,公共領域)

 

【世界台】臉書專頁

您可以 留言回應, 或 追蹤

留言