P全球【世界台】中國ê氣候態度看重國際政治

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語,就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

美國宣佈退出巴黎協定,真濟人講,中國凡勢成做世界對抗氣候變化ê領導者。敢有影?北京按怎拍算?其實佇中國,氣候懷疑論mā bat真大聲,毋過性命無長。總講,中國看氣候議題,真重要是teh考慮和西方ê競爭。

 

懷疑、甚至否認人類造成地球溫度升懸,反對減用化石燃料來救氣候,這是真典型ê美國右派立場,毋過伊uan-ná[1] 有中國版本。這期美國《外交政策》雜誌刊一篇專題報導,探討中國版氣候懷疑論這幾年的發展,講伊的消失真「著時」 。

 

2009年底ê Copenhagen聯合國氣候大會,全世界本底期待會當達成具體規定減碳義務ê協議,結果無成,就是因為中國創空。中國當teh需要燒koh-khah塗炭來發展,一个限定排碳量ê協議對伊無好處。

 

這篇文章ê作者Geoff Dembicki寫講,至少彼陣,中國官方相信氣候變化ê威脅是真ê,只是in宣稱Copenhagen ê議程是發達國家ê陰謀,欲使弄南方陣營分裂。

 

Copenhagen煞鼓一個月後,中國ê氣候談判首席代表卻佇國際場合講,地球溫暖化,到底是毋是人為造成,愛koh評估。遮的話予外界意外,雖然用意不明,毋過中國ê氣候懷疑論,就佇彼段時間開始tshìng起來。

 

上出名ê評論者之一是財務教授郎咸平,伊講氣候變化是西方發明ê騙局,目的是為著家己趁錢,佮阻止中國發展。同時,有真濟冊上市,網路頂mā四界有質疑氣候變化ê言論。但是,大部份關心ê毋是科學,是國際強權政治。莫怪有論者主張:重點無應該是佮西方爭論氣候變化有影無,是中國愛按怎這局。

 

Dembicki寫講,仝時間,中共中央卻恬仔聚集共識,認定愛嚴肅應對氣候變化。其中ê考慮包括中國ê經濟成長已經變慢,綠色科技可能會當救經濟。另外,傳統能源國營企業ê高層,真濟佇反貪行動當中hőng[2] 打揲,所以維護化石燃料利益ê聲音mā消去。

 

作者無確定中共敢有特別打壓氣候懷疑論,毋過講,看起來,自2011年,中央確定綠色能源路線了後,懷疑論ê聲音就差不多恬去矣。

 

中國佇2015年巴黎協定提出ê目標,包括佇2030年總排碳量到高峰,紲落就愛減落來。但是中國koh預測會當提早達成,有分析講,這真主要是因為經濟放慢佮人口老化,能源的需求自然會降低。

 

特色圖片:習近平主席於2015年巴黎氣候峰會。UNclimatechange via flickr. 創用cc 2.0 姓名標示條款授權 (CC BY 2.0) 。

 


[1]uan-ná:也
[2]hőng:予人(hōo lâng)的合音,被

 

【世界台】臉書專頁

您可以 留言回應, 或 追蹤

留言