P全球【世界台】Merkel行向四連任 德國國際責任僫走閃

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語,就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

德國9月24欲舉行國會大選,一般預測總理Angela Merkel會當輕鬆四連任。世界上較關心ê,是伊繼續領導ê德國,敢會佇國際事務頂頭較積極,並且,和一个非傳統ê美國政府愛維持啥物款ê關係。

 

美國總統Donald Trump進前批評德國對美國有真大ê貿易順差,軍費koh少,án-ne對美國「真害」。德國媒體資深記者Stefan Theil佇這期《外交事務》雜誌ê文章講,Trump ê聲嗽kài好,毋過重點大概正確,就是德國uì現在ê全球秩序得著真利益,卻對維護這个秩序貢獻無夠。這陣,德國袂當koh閃責任矣。

 

軍事尤其是重點。露西亞對歐洲安全ê威脅大起來,仝時陣,Trump不滿北大西洋公約組織ê真濟成員國,無照組織設定ê目標,共國防支出提到GDP ê 2%。德國目前是1.2%,已經同意會佇2024年達成目標。

 

因為二戰ê教訓,冷戰時代ê西德真無愛發展軍事,統一了後ê德國,mā到這幾年才慢慢仔改變,tsit-má佇16个國外ê緊張地區有駐軍,毋過大部份ê任務攏毋是直接參與戰鬥。

 

Theil講,koh-khah大ê問題是:德國並無一套較全面ê戰略,較拄著一項做一項,而且民意無啥願意對抗露西亞。6月ê一份民調講,25% ê德國人信任露國總統Vladimir Putin,kan-na 11%信任Trump。露西亞佇2014年併吞Crimea了後,西方發動經濟制裁,但是連Merkel本人,對制裁ê態度,前後mā無完全一致。

 

作者講,不管經濟抑是國防,德國猶是一定需要美國,毋過Merkel考慮著民意,mā袂當佮Trump行傷。另外,Trump對盟邦較無堅定,會加速德國重思考家己ê全球角色,這顛倒是一件好代誌。

 

頂日仔,Merkel接受國內報紙訪問,表示若有機會,伊贊成德國介入協調北朝鮮ê核武問題。《衛報》講,這反映出歐洲驚Trump共危機舞kah愈害。毋過這非常困難,畢竟過去ê談判攏失敗矣,北朝鮮宣稱伊ê核武計劃是無參詳ê。總是Merkel ê國際承擔,koh行一大步。

 

德國總理Angela Merkel與美國總統Donald Trump。The White House via flickr.公眾領域標章 1.0 (PDM 1.0)

【世界台】臉書專頁

您可以 留言回應, 或 追蹤

1 篇回應 to “【世界台】Merkel行向四連任 德國國際責任僫走閃”

  1. qq 說:

    感謝世界台的台語評論
    不那可以學到台語,閣可以聽到新聞
    真正好

留言