P專題【技藝101】畫形圖

黃明輝的畫形圖教學廣告

編輯 / 余榮宗、黃能揚、李江却台語文教基金會 陳豐惠 劉承賢

攏欲買舊冊來學畫。
Lóng beh bé kū-tsheh lâi o̍h uē.

二十歲甲四十歲遐畫上濟,可能畫…..算袂完- -啦
Jī-tsa̍p huè kah sì-tsa̍p huè hia uē siōng-tsē, khó-lîng uē…..sǹg bē-uân- -lah.


狹櫼ê巷仔,傳統ê店仔,這是老士林獨有ê氣氛。見若到欲暗仔,人像畫師傅黃明輝照例開門守畫擔,坐佇角仔攑筆幾若十年,予這無夠五坪ê畫室,眾生人像滿滿是。
E̍h-tsinn ê hāng-á, thuân-thóng ê tiàm-á, tse sī lāu Sū-lîm to̍k-iú ê khì-hun. Kìnn-nā kàu beh-àm-á, jîn-siōng uē sai-hū N̂g Bîng-hui tsiàu-lē khui-mn̂g tsiú uē-tànn, tsē tī kak-á gia̍h-pit kuí-nā tsa̍p nî, hōo tse bô-kàu gōo phênn ê uē-sik, tsiòng-sing jîn-siōng muá-muá-sī.

19歲來士林就開始畫油畫–ah。我彼時陣攏畫人美形君,啊古典畫。181446 13歲就畫,這馬63,拄仔好50年。
Tsa̍p-káu huè lâi Sū-lîm tō khai-sí uē iû-uê. Guá hit-sî-tsūn lóng uē lâng bí-hîng-kun, ah kóo-tián-uē. Tsa̍p-sann huè tō uē, tsit-má la̍k-tsa̍p sann, tú-á-hó gōo-tsa̍p nî.

因為對畫圖有興趣,伊無師自通揣資料照咧畫,一筆一畫ê訓練,予家己會當倚靠這項技術生活,佇相機猶未普遍ê年代,想欲留下影像記念,就需要靠畫師來鬥相共。
In-uī tuì uē-tôo ū hìng-tshù, I bû-su tsū-thong tshuē tsu-liāu tsiàu leh uē ,tsi̍t-pit tsi̍t-pit ê hùn-liān, mā hōo ka-kī ē-tàng uá-khò tsit-hāng ki-su̍t seng-ua̍h, tī siòng-ki iáu-buē phóo-phiàn ê nî-tāi, siūnn-beh lâu-hā iánn-siōng kì-liām, tō su-iàu khò uē-sai lâi tàu-sann-kāng.

感覺講對畫有彼價值ê人才會畫,子弟較有孝彼種–ê較會畫,畫長輩起來懷念。181708相片若較無清,嘛愛十分之八以上才會使–得,啊相片若清,攏九分十分。
Kám-kak kóng tuì uē ū he kè-ta̍t ê lâng tsiah ē uē, tsú-tē khah iú-hàu hit-tsióng–ê khah ē uē, uē tióng-puè khí-lâi huâi-liām. Siòng-phìnn nā khah bô tshing, mā ài tsa̍p-hun-tsi peh í-siōng tsiah ē-sái- -tit, ah siòng-phìnn nā tshing, lóng káu hun tsa̍p hun.

因為是畫人像,對細節ê要求特別懸,看黃明輝完成ê逐幅畫像,出神ê程度就佮相片仝款,閣加添畫筆ê溫度,畫出名了後,甚至有學生來要求代筆ê趣味代。
In-uī sī uē jîn-siōng, tuì sè-tsiat ê iau-kiû ti̍k-pia̍t kuân, khuànn N̂g Bîng-hui uân-sîng ê ta̍k-pak uē-siōng, tshut-sîn ê thîng-tōo tō kap siòng-phìnn kāng-khuán, koh ke-thinn uē-pit ê un-tōo, uē tshut-miâ liáu-āu, sīm-tsì ū ha̍k-sing lâi iau-kiû tāi-pit ê tshù-bī tāi.

逐女朋友- -ê,較會提來畫較濟- -啦
彼陣仔嘛攏畫素描彼種- -ê較濟,攏欲逐女朋友,啊畫畫- -咧予伊講家己畫- -ê按呢。
Jiok lú-pîng-iú- -ê, khah ē the̍h lâi uē khah tsē- -lah. Hit-tsūn-á mā lóng uē sòo-biô hit-tsióng- -ê khah tsē, lóng beh jiok lú-pîng-iú, ah uē-uē- -leh i kóng ka-kī uē- -ê án-ne.

一工有ê教一个兩个按呢niâ,總共才教三个四个爾爾,無法度通好教濟,因為這所在太狹- -咧,有人學生有興趣,有興趣著愛教才會使- -得。
Tsi̍t kang ū ê kà tsi̍t ê nn̄g ê án-ne niâ, tsóng-kiōng tsiah kà sann ê sì ê niā-niā, bô-huat-tōo thang-hó kà tsē, in-uī tse sóo-tsāi thài e̍h- -leh, ū lâng ha̍k-sing ū hìng-tshù, ū hìng-tshù tio̍h-ài kà tsiah ē-sái- -tit.

雖然這馬美術科系真濟,但是傳統畫人像ê行業猶原是拄著崩崁,所以黃明輝有閒就教囡仔畫圖,就親像門頂貼ê標語,伊會kā這間細細間ê畫室守牢- -咧,予筆下面目繼續流傳
Sui-jiân tsit-má bí-su̍t kho-hē tsin-tsē, tān-sī thuân-thóng uē jîn-siōng ê hâng-gia̍p iû-guân sī tú-tio̍h pang-khàm, sóo-í N̂g Bîng-hui ū-îng tō kà gín-á uē-tôo, tō tshin-tshiūnn mn̂g-tíng tah ê phiau-gí, i ē kā tsit-king sè-sè king ê uē-sik tsiú-tiâu- -leh, hōo pit-hā bīn-bo̍k kè-sio̍k liû-thuân.

欲閣畫甲袂畫- -得,因為有興趣,啊感覺猶閣會畫就加減畫就著,目睭猶閣無差,若差就袂使畫- -ah。
Beh koh uē kah bē uē- -tit, in-uī ū hìng-tshù, ah kám-kak iáu-koh ē uē tō ke-kiám uē tō tio̍h, ba̍k-tsiu iáu-koh bô tsha, nā tsha tō bē-sái uē- -ah.

記者 余榮宗 台北市報導
Kì-tsiá Î Îng-tsong Tâi-pak-tshī pò-tō.

※ 本單元是公共電視及李江却台語文教基金會合製。歡迎 link 做非營利教學使用。

※ 看過去的單元

※ 看本篇文章出現亂碼?安裝Taigi字型吧!

1. 請下載並安裝 Taigi Unicode 字型(http://taigi.fhl.net/TP/taigi_unicode_font.htm)。
2. 使用 Firefox (moztw.org/ ) 或 Chrome ( www.google.com/chrome )等瀏覽器。

※ 技藝101記憶地圖


在較大的地圖上查看技藝101記憶地圖

您可以 留言回應, 或 追蹤

留言