P專題【技藝101】做獅頭

技藝101-做獅頭

編輯 / 余榮宗、黃能揚、李江却台語文教基金會 陳豐惠 劉承賢

唐山過台灣ê時陣- -honnh,tsia-ê先祖過–來,才有開始有弄獅- -ê-嘛
Tn̂g-suann kuè Tâi-uân ê sî-tsūn- -honnh, tsia-ê sian-tsóo kuè–lâi, tsiah ū khai-sí ū lāng-sai- -ê-mah.

Mí-lih若加- -一-屑-仔,有可能tsit隻獅仔就散形- -ah
Mí-lih nā ke- -tsi̍t-sut-á, ū khó-lîng tsit tsiah sai-á tō suànn-hîng- -ah.

做囡仔ê時上愛- -ê就是看弄獅niâ,上熱鬧- -嘛,所以對hit當陣開始,接觸tsit項,有hit个感覺欲摸tsit項。到目前,按呢嘛將近咧欲三十年有- -ah
Tsò gín-á ê sî siōng-ài- -ê tō sī khuànn lāng-sai niâ, siōng-lāu-jia̍t- -mah, sóo-í tuì hit-tang-tsūn khai-sí, tsiap-tshiok tsit hāng, ū hit-ê kám-kak beh bong tsit hāng. Kàu bo̍k-tsîng, án-ne mā tsiong-kūn leh beh sann-tsa̍p nî ū- -ah.

「弄獅」是傳統ê民俗文化,有辟邪制煞ê意義,一般koh分做北獅、南獅,佇台灣主要是廣東獅佮福建獅。人kā號做「獅頭」ê施順榮,伊會開始做獅頭,攏是因為一段故事
“Lāng-sai” sī thuân-thóng ê bîn-sio̍k bûn-huà, ū phik-siâ tsè-suah ê ì-gī, it-puann koh hun-tsò Pak-sai, Lâm-sai, tī Tâi-uân tsú-iàu sī Kńg-tang-sai kap Hok-kiàn-sai. Lâng kā hō-tsò “Sai-thâu” ê Si Sūn-îng, i ē khai-sí tsò sai-thâu, lóng sī in-uī tsi̍t tuānn kòo-sū.

聽著一陣咧弄獅ê囡仔- -honnh,in咧講台灣獅像乞食獅–啦,你koh再按怎講- -honnh,台灣獅,he嘛是咱ê一種傳統- -啊,所以我hit-má轉- -來我就開始專心落去研究tsit隻台灣獅- -ah
Thiann-tio̍h tsi̍t tīn leh lāng-sai ê gín-á- -honnh, in leh kóng Tâi-uân-sai tshiūnn khit-tsia̍h-sai- -lah, lí koh-tsài án-tsuánn kóng- -honnh, Tâi-uân-sai, he mā sī lán ê tsi̍t tsióng thuân-thóng- -ah, sóo-í guá hit-má tńg- -lâi guá tō khai-sí tsuan-sim lo̍h-khì gián-kiù tsit tsiah Tâi-uân-sai- -ah.


心內不服ê施順榮,對八家將ê花面得著靈感,加上立體刻浮ê設計,kā改良了後ê台灣獅ê造型,號做「鹿港花獅」。
Sim-lāi put-ho̍k ê Si Sūn-îng, tuì Pat-ka-tsiòng ê hue-bīn tit-tio̍h lîng-kám, ka-siōng li̍p-thé khik-phû ê siat-kè, kā kái-liông liáu-āu ê Tâi-uân-sai ê tsō-hîng, hō-tsò “Lo̍k-káng Hue-sai”.

註:
刻浮:華語『浮彫』,嘛講做「浮花、拍浮花」。

一隻獅仔其實我感覺較重要欲注意- -ê就是講,你愛予伊- -honnh,有「喜而不輕,啊威而不怒」ê hit个感覺。我欲保有tsit八字,愛揣我足大ê精神
Tsi̍t tsiah sai-á kî-si̍t guá kám-kak khah tiōng-iàu beh tsù-ì- -ê tō sī kóng, lí ài hōo i- -honnh, ū “hí jî put khing, ah ui jî put nōo” ê hit-ê kám-kak. Guá beh pó-iú tsit peh jī, ài tshuē guá tsiok tuā ê tsing-sîn.

我畢身所學- -honnh,總是愛有人來kā我傳承- -啊,按呢我身份證若交- -轉-去ê時陣,我較無遺憾,所以我才會想講落去開班開始教學生按呢
Guá pit-sin sóo-ha̍k- -honnh, tsóng-sī ài ū lâng lâi kā guá thuân-sîng- -ah, án-ne guá sin-hūn-tsìng nā kau- -tńg-khì ê sî-tsūn, guá khah bô uî-hām, sóo-í guá tsiah ē siūnn-kóng lo̍h-khì khui-pan khai-sí kà ha̍k-sing án-ne.

伊一點仔人較早ê師傅氣口嘛無,啊毋過,伊有一寡做師傅ê hit種堅持。老師kā你教hit種基本ê hit種一寡理念、觀念,你愛堅持
I tsi̍t-tiám-á lâng khah-tsá ê sai-hū khuì-kháu mā bô, ah m̄-koh, i ū tsi̍t-kuá tsò sai-hū ê hit-tsióng kian-tshî. Lāu-su kā lí kà hit-tsióng ki-pún ê hit-tsióng tsi̍t-kuá lí-liām, kuan-liām, lí ài kian-tshî.

總- -是佇學員ê眼中蓋好鬥陣ê施順榮,為著對作品ê堅持,加上伊藝術家ê個性,予伊加食誠濟苦
Tsóng- -sī tī ha̍k-uân ê gán-tiong kài hó tàu-tīn ê Si Sūn-îng, uī-tio̍h tuì tsok-phín ê kian-tshî, ka-siōng i gē-su̍t-ka ê kò-sìng, hōo i ke tsia̍h tsiânn tsē khóo.

就咧無錢通貸款- -ah,欲納貸款- -ah,有人欲來買獅,就干焦為著一句話,啥mih欲予囡仔耍- -ê,我聽一下足無歡喜- -ê,kā拒絕,等甲人走ê時陣,其實我嘛後悔- -呢
To leh bô tsînn thang tāi-khuán- -ah, beh la̍p tāi-khuán- -ah, ū lâng beh lâi bé sai, tō kan-tann uī-tio̍h tsi̍t kù uē, siánn-mih beh hōo gín-á sńg- -ê, guá thiann tsi̍t-ē tsiok bô huann-hí- -ê, kā kī-tsua̍t, tán kah lâng tsáu ê sî-tsūn, kî-si̍t guá mā hiō-hué- -neh.

施順榮講,做獅頭趁無錢,主要是為著傳統文化咧拍拚
Si Sūn-îng kóng, tsò sai-thâu thàn bô tsînn, tsú-iàu sī uī-tio̍h thuân-thóng bûn-huà teh phah-piànn.

「歡喜做,甘願受」- -嘛,in一般人較幸運。別人咧做工課是為著生活,我咧做工課,是我ê興趣。
“Huann-hí tsò, kam-guān siū”- -mah, in it-puann-lâng khah hīng-ūn. Pa̍t-lâng leh tsò khang-khuè sī uī-tio̍h sing-ua̍h, guá leh tsò khang-khuè, sī guá ê hìng-tshù.

記者 余榮宗 彰化報導
Kì-tsiá Î Îng-tsong Tsiong-huà pò-tō.

※ 本單元是公共電視及李江却台語文教基金會合製。歡迎 link 做非營利教學使用。

※ 看過去的單元

※ 看本篇文章出現亂碼?安裝Taigi字型吧!

1. 請下載並安裝 Taigi Unicode 字型(http://taigi.fhl.net/TP/taigi_unicode_font.htm)。
2. 使用 Firefox (moztw.org/ ) 或 Chrome ( www.google.com/chrome )等瀏覽器。

※ 技藝101記憶地圖


在較大的地圖上查看技藝101記憶地圖

您可以 留言回應, 或 追蹤

留言