P全球【世界台】美國擋中國收購  狗蟻都無路

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語,就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

中國巨商馬雲ê「狗蟻金服(蚂蚁金服)」欲收購美國ê匯款服務公司速匯通(MoneyGram),開年煞宣佈放棄,因為美國政府毋准,理由是國家安全。分析者講,這代表佇較緊張ê美中關係之下,中國佇美國ê大收購好煞鼓矣。

 

舊年正月,Donald Trump猶未就任美國總統ê時,馬雲就和伊見面,宣稱欲佇美國創造100萬个頭路。《Wall Street日報》專欄作家Anjani Trivedi寫講,這聲連伊ê計畫都碰壁,中國公司佇美國較有規模ê併購,今後應該無矣。

 

馬雲和Trump 會談了後無偌久,狗蟻金服就宣佈欲收購總部佇德州Dallas ê速匯通,開價8.8億美金。狗蟻金服這幾年積極佇全球闊市場,毋過佇美國並無順利,伊想欲共速匯通買起來,接收後者佇美國佮世界200國ê消費者,án-ne加較緊。

 

這个計畫拄著競爭者。來自美國Kansas州ê Euronet公司mā想欲買速匯通,落尾狗蟻金服出價提懸到12億美金,得著速匯通ê董事會同意,毋過中國企業ê身份一直有政治疑慮。因為需要通過財政部主導ê外資委員會審查,狗蟻佮Euronet分別遊說國會議員捙拚

 

Euronet主張講,今後ê戰爭是資料戰爭,狗蟻若是收購成功,會提著大量美國消費者、包括軍人ê個人資料,危害國家安全。這mā是目前美國黨派ê主流看法,果然,外資委員會最後建議總統否決此案。

 

Trivedi寫講,中國本身對外來投資mā無偌開放,雖然最近政策有放較,毋過美國已經行向保護主義。《金融時報》社論ê看法無啥仝,認為這是中國保護主義ê報應:「明白,若是立場對換,一間美國公司欲買中國ê目標,中國會共落來。」金融是中國保護kah周至ê產業之一,到tann講欲較開放,跤步猶是拖。

 

【世界台】臉書專頁

馬雲 (2015.3.3)。自:flickr, 由:好樣視覺影像 VG Photo Studio (CC BY-SA 2.0)

您可以 留言回應, 或 追蹤

留言