P全球【世界台】Trump予Iran核子協議「最後機會」

文 / 周盈成

以下這篇短文,是用教育部公布的台語標準用字寫成。一點都不難,認得中文、略通台語,就懂八九成了。還有聲音檔唸給你聽,許多字詞也超連結到教育部《臺灣閩南語常用詞辭典》。看世界新聞,兼學台語文,就是【世界台 ~ Sè-kài Tâi】啦!

美國總統Donald Trump頂禮拜五宣佈koh忍受Iran核子協議120工, 時到,若是這个前任政府主導簽訂ê多國協議koh袂改得,美國就欲退出,單獨對Iran恢復相關制裁。若真正án-ne,毋但中東局勢,連美國和歐洲盟邦ê關係mā會出現大變化。

 

2015年7月,經過長年ê談判,美國、露西亞、中國、 英國、法國、德國六个國家,和Iran達成協議,Iran愛縮減伊ê核子設備佮活動,限制佇和平用途,接受國際檢查,來交換國際停止對伊ê制裁。

 

毋過美國共和黨鷹派自頭就認為這个協議對Iran過寬容,koh無法度長期保證後者袂發展核子武器。Iran佇中東tsē-tsē所在和美國做對頭,比論支持Syria ê Assad政權,贊助恐怖活動,koh威脅以色列ê安全。Trump佇競選ê時就講這个協議是「自來bái」,當選欲共廢掉。

 

根據當初美國國會針對這个協議立ê法,總統暫停制裁Iran ê決定,愛定期重批。這遍是Trump第三擺真毋甘願來同意維持協議,毋過伊講,這只是為著促成歐洲盟邦同意來修正協議內底真害ê缺點,「這是最後ê機會」,若做袂到,美國就袂koh再為著遵守協議來繼續暫停制裁。

 

同時,伊呼籲國會修法,規定美國簽ê Iran協議愛有特定ê內容,永遠、澈底封死Iran發展核武ê任何可能性。

 

毋過一般認為,Trump開ê條件,Iran無可能接受,所致,堅持tsit-má ê協議已經是可行範圍內上好ê歐洲盟邦,嘛無可能佇未來四個月改變立場。

 

連較支持Trump政府êWall Street日報》嘛佇社論講,Trump共話講kah tsiah-nī硬,是予家己無後步

 

社論贊成Trump對協議ê批評,包括部份條款到2023年就「日落」、無規定著Iran ê彈道飛彈計畫、檢查機制不足等等。但是若歐洲盟邦無贊成重談判,美國就愛單獨退出協議,實施制裁,對象會包括佮Iran做生理ê歐洲公司。

 

這篇社論研判Iran袂因為美國退出,mā隨退出協議,趕緊做核彈;伊較有可能利用歐洲佮美國ê矛盾來爭取利益。Trump  tsit-má家己畫一條紅線,敢若leh佮人相輸,時到若盟邦毋配合,伊若無就愛真正退出,若無就會傷害家己ê國際信用。

 

是講,Trump ê信用問題,mā毋是自這陣才有。

 

資料照片:Donald Trump, 2017.8.30. flickr 白宮官方攝影: Joyce N. Boghosian (相片是公領域)

【世界台】臉書專頁

您可以 留言回應, 或 追蹤

留言