P全球【世界台】中國佇印度洋設債務陷坑

文 / 周盈成

以下短文以教育部公布的台語標準用字寫成。一點都不難,認得中文、略通台語,就懂八九成了。還有聲音檔唸給你聽,許多字詞也超連結到教育部的臺語常用詞辭典。看世界新聞,兼學台語文,就是【世界台 ~ Sè-kài Tâi】啦!

中國借錢予較ê國家,利用債權來控制債務國,包括取得港口來做軍事用途,這幾年佇印度洋動作特別大,對地緣政治ê影響,引起tsē-tsē國家緊張。

 

佇印度西南方ê小群島國Maldives,這陣有機場、大橋、港口等等幾若个大建案teh進行,主要攏是共中國ê官方銀行借錢,koh由中國ê工程公司承造。根據國際貨幣基金(IMF)估計,經濟主要靠觀光業ê這个小國,今年ê債務可能會超過GDP ê 100%。

 

Maldives政府三年前命令一个小島Gaadhoo頂頭ê居民徙走。媒體引述政治界ê風聲講,總統Abdulla Yameen已經暗中答應欲共這个島交予中國,中國準備欲佇tsia建立軍事基地。

 

類似ê情形已經發生佇其他所在。Sri Lanka ê前總統共中國貸款,建設南部ê Hambantota港,伊佇三年前落選落台,一部份原因就是傷親中。毋過Hambantota計畫留落來ê欠數傷大條,商業效果koh無好,經過紛擾ê抗議佮協商,現任政府共這个港口租予中國來拄數,租約99年,舊年底已經正式移交。

 

Hambantota至少有約束袂當做軍事用途。仝一年,中國佇東非ê Djibouti成立伊ê第一个海外軍事基地;另外,Pakistan ê Gwadar港租予中國40年,雖然講限定非軍事,毋過中國已經計畫佇附近koh成立一个海軍基地。

 

美國智庫「全球發展中心(Center for Global Development)」頂禮拜發佈一份報告,講佇中國ê「一帶一路」計畫衝擊之下,有八个國家tshu入債務苦境ê風險特別懸。頂頭講著ê Maldives、Djibouti佮Pakistan攏在內。

 

印度戰略學者Brahma Chellaney,中國用「債務陷坑」ê步數,來共小國ê自主性束縛,迫in聽話,共in納入中國ê戰略軌道。有ê手段,像長期租約,就和往過歐洲殖民強權用來對付中國ê仝款。

 

Chellaney講,中國共勢力愈來愈伸向印度洋,尤其是印度四箍輾轉ê國家,就是刁工欲共印度包圍。

 

這个區域目前ê主要強權猶是美國佮印度,這兩國加上日本、澳洲,tng-teh計畫聯合來對抗中國佇印度洋和太平洋ê擴張。除了tsia-ê大國ê警戒,《經濟學人》雜誌講,佇予中國插手ê小國,屈辱ê債務重整和貪腐ê風聲,mā加深國內衝突,一帶一路帶來這个區域ê,毋是發展和穩定,suah是敵對。

 

特色圖片:此圖為島上的建案。位於印度西南方的小群島國馬爾地夫,有機場、大橋與港口等幾個大建案正在進行,這些建案主要是向中國官方銀行借錢,再由中國工程公司建造。photo credit: Mickey Luigi Logitmark, https://goo.gl/ozrNQy, (CC BY 2.0)

 

【世界台】臉書專頁

您可以 留言回應, 或 追蹤

留言