【台文話藝】風颱天

毋知恁對風颱天按怎看法，老實講，我以早是愛甲欲害，tse原因無講恁凡勢嘛攏知，風颱若來，學校佮補習班就免siunn理睬，看是欲踮厝- -裡the，抑是欲去外口看電影bóng ûn街，較早捌有一句時行ê話，號做「天頂ê禮物跋落地」，我往過就是按呢咧看風颱- -ê，風颱天阮就thang好涼勢仔涼勢。

毋過，風颱天歇睏毋是必然ê道理，若毋信，你看電影院佮百貨公司仝款門開開開，人客窒甲滇滇滇，另外，電視新聞內底，記者閣著刁工tshî風淋雨潦過來泅過去，袂輸咧表演特技，我是看甲飽佮醉，自按呢我決定大漢無愛踮電視台作穡，較免風颱天閣著phe命變猴戲，袂輸齒bín攑咧欲去kā 鱷魚洗喙齒，想攏袂曉台灣ê新聞製作ná會tsiah-nī-á無花字 (hue-jī)。

後- -來，我較大漢- -矣，才知影，風颱天對濟濟人來講，是親像tsing-piàng hiah-nī-á雄死，有人予風颱拍歹溫暖ê厝宅 (tshù-theh)，財產予風吹- -去予水流- -去，風颱走- -矣，經濟煞oh維持 (î-tshî)，毋知佗位會當徛起，閣較有人是因為風颱來過身，或者是失去心愛ê牽手、爸母、囝兒，想想咧，風颱歇假煞ná親像是建立佇別人ê痛苦頂面，毋才後- -來，我無閣hiah-nī-á期待風颱天。

是講，風颱欲來袂問我意見啦。俗語話講:「夏至風颱著出世。」 (Hā tsì, hong-thai tioh tshut-sì) 亞熱帶ê台灣，見若熱- -人，風颱免請家己來。閣tsit幾冬，秋天ê小陽春 (siáu-iông-tshun) 若熱- -起-來嘛蓋驚- -人，都風颱憶著 (it-tioh) 熱，九月了後閣毋肯放咱煞，我想，古早人講「九月颱無人知」(Káu–gueh thai，bô lâng tsai) ê時，絕對想袂到講二十一世紀ê風颱會tsiah înn纏。過去五十冬，十一- -月初立冬hit跤兜，就計共(kē-kiōng)有六个風颱行跤到，若地球ê溫度繼續tshìng 懸- -起-lih，未來風颱sńg-tng人ê本等恐驚仔會ke閣較gâu，後半冬逐不時都來咧kā咱攪擾。

話講到tsia，袂輸風颱天無一塊好咧，其實嘛毋是攏按呢啦，咱知影講台灣ê溪水愛走東西向，順山勢落崎直sià入海，坐袂定著無足大才 (tāi-tsâi)，著靠水庫囤 (tún) 水才有事使 (ū sū-sái)。換話來講，就是：台灣人若欲水有夠用有夠啉，按呢風颱雨就愛bóng sîn！若規个熱- -人攏直直出大日虎，無落較tsiânn mih ê雨，按呢，咱日子嘛會綴咧艱苦。為著欲予水庫止喙焦，風颱天ê時，咱上希望水庫啉了有飽lâ。

上尾- -矣，毋知各位敢知影，風颱驚啥?予恁想袂到！當時仔風颱上驚ê就是霆雷公啦！這我無烏白講 oo，人講：「一雷破九颱, 無雷九颱來。」(Tsit luî phuà káu thai, bô luî káu thai lâi.) 意思就是，若定定霆雷，風颱就會驚會畏，所以熱天若不時霆雷公，彼年風颱ê氣勢就無hiah旺。斟酌kā想，tsit站仔熱- -人甲tann，ká-ná罕得聽雷公霆- -hoonnh，無的確今年風颱會真厚oo，若是按呢，風颱天ê時，希望逐个做伙佇心內祈禱，向望無人因為風颱受著傷害，嘛感謝風颱飼水庫啉水，兼予著磨(tioh-buâ) ê辛勞佮學生仔有一个意外ê假期。