【世界台】菲打壓異議 UN人權專家列恐怖份子

菲律賓政府最近共600外个人列做恐怖份子，講in是共產黨或者是有牽連。這內面有真tsē民權、社運人士佮政治異議者，甚至包括聯合國原住民族人權專家。抗議者講這是烏白編罪名，恐驚koh會造成一場害命ê人權災難。

菲律賓共產黨（CPP）ê新人民軍（NPA）參政府相戰已經半世紀，期間也bat和談。自稱左派ê總統Rodrigo Duterte 2016年中就任了後，恢復談判，毋過舊年11月喝停，理由是共軍方面無停火，刣死警察佮平民。

12月，Duterte宣佈共產黨佮新人民軍是恐怖組織。照程序，這需要法院裁定，司法部佇3月初提出聲請，除了針對以上兩个組織，koh列出600外个個人，講是恐怖份子。

名單內底上顯目ê 是Victoria Tauli-Corpuz，伊往過長期領導呂宋島北部ê原住民運動，tsit-má是聯合國原住民族權利特別報告員，負責全世界相關狀況ê調查。伊佇國外ê會議頂頭講，Duterte政府愈來愈法西斯， 國內有真tsē原住民為著抵抗這个政府ê壓迫，suah hőng[註1]殺害。伊批評政府共伊囥入去恐怖份子名單，是「無根據、惡意、無負責任」。

非政府ê菲律賓人權促進聯盟（Karapatan）發起國際抗議行動，講Duterte政府是用反恐做借口，來打壓異議者。前兩任總統 mā bat開類似ê烏名單，頂頭ê人真tsē後來攏hőng用假罪名掠去關、刑虐、殺害，抑是失蹤。人權觀察（Human Rights Watch）組織駐菲人員甚至講，「這就是一份官方暗殺名單」。

Duterte就任總統以來，共伊做市長ê時完全無法治觀念ê「反毒戰爭」擴大到全國，鼓勵警察和民兵凊彩暗殺任何in認為和毒品有牽連ê人，死亡人數估計已經有1萬2000至2萬。國際刑事法院（ICC）2月初宣佈欲對可能ê犯罪進行預審，無偌久，菲律賓政府就宣佈欲退出這个國際組織所根據ê條約。