【世界台】西歐新反猶現象ê複雜面貌

「反猶主義」ê烏雲koh罩佇歐洲ê天頂。敢是Nazi koh來矣？其實這波無平靜和20世紀初有寡無仝，牽涉著Muslim ê角色，佮以色列佇中東ê作為。複雜ê互動關係，用傳統上對左、右派ê印象，較僫理解。

3月23，巴黎，85歲ê猶太老阿婆Mireille Knoll予人發現死佇伊蹛ê公寓內底，身軀予人揬11刀，而且放火燒過。警察掠著兩个20外歲ê嫌犯，主嫌來自北非移民家庭，自細漢就是死者ê厝邊，互相熟似。伊ê共犯講，伊進前就講Knoll是猶太人，應該真好額；而且伊刣人了後koh喝「真主偉大！」根據這兩點，官方認為這是一件反猶ê謀殺案。

受害者Knoll做囡仔就蹛佇巴黎。1942年，Nazi 佇巴黎大圍捕，共1萬3000外个猶太人掠去集中營，in後來差不多總無出來，9歲ê Knoll逃過彼改圍捕。如今，大屠殺ê存活者煞án-ne遇害，象徵意義特別強。3月28，數千人行上巴黎街頭紀念伊，抗議種族仇恨。

自2006年一个猶太少年人予Muslim兇手刣死以後，法國ê猶太人社群就真驚惶，後來koh陸續有類似案件，毋過愛等kah 2015年，幾若件重大ê恐怖攻擊了後，主流社會才開始慢慢仔承認「新反猶」毋但存在，而且是對規个社會ê攻擊。

這遍ê大遊行，發動者是法國猶太團體聯合會（CRIF），事先就宣佈無歡迎極右派政黨國民陣線（Front national） 佮極左派ê硬氣法國（La France Insoumise） ê頭人來參加。國民陣線是因為有反猶ê歷史；硬氣法國是因為誠批判以色列ê Palestine政策。

毋過資深記者Sylvain Cypel指出，現場狀況就看會出鋩角矣。兩黨ê領袖猶是有來，國民陣線ê Marine Le Pen毋但加入遊行有一觸久仔，koh有猶太團體ê人共保護，硬氣法國ê Jean-Luc Mélenchon煞袂當，只好隨走。

Cypel分析，猶太聯合會死忠支持以色列，並且無歡迎Muslim移民，所以佮tsit-má主要teh反Muslim移民ê國民陣線較有共同點。

另外一方面，較慢來法國ê Muslim移民，對猶太人ê反感，有幾若个來源：家己受著排斥、共猶太人看做等於以色列，佮認為猶太人好額、統治世界等等。猶太人佮Muslim之間ê敵意互相激化。

佇海峽對岸，英國ê工黨仝幾日仔mā有反猶爭議。黨領袖Jemery Corbyn 六年前佇面冊頂ê一條留話予人挖出來，講伊支持一幅反猶壁畫，彼幅圖若像是teh剾洗猶太資本家。Corbyn後來會失禮。另外，有一位黨幹部，因為支持一位予人指控否認大屠殺ê地方候選人，予人抗議，來落台。

《經濟學人》雜誌分析講，極左派反以色列、反資本主義，雖然這無等於反猶，但是政治爭論當激烈ê時，界線定定袂明。Corbyn koh會為著反美國ê中東政策，和極端Islam份子來去。

Corbyn這遍承諾會改正工黨內底ê反猶，毋過《經濟學人》這篇專文認為伊袂實行。除了伊個人ê極左紀錄以外，koh有兩項原因，一是英國Muslim人口比猶太人加真濟，而且集中佇對工黨真重要ê選區；二是Corbyn ê反種族主義是牽連階級佮剝削，猶太人是上成功ê少數族群，而且毋是靠社會政策，袂得著伊ê同情。