【世界台】Myanmar換政權 美國制裁未取消

美國國務卿John Kerry佇禮拜訪問Myanmar，代表後者政權轉換了後雙方關係一个新ê開始。毋過美國猶是維持真大部份對Myanmar ê制裁，因為Myanmar ê真濟企業猶是軍方佮in ê關係者咧掌握。

美國佇5月17宣佈新ê對Myanmar制裁計畫，kā七間國營企業佮三間國營銀行解禁，美國企業自tsit-má開始會使佮in往來。另外koh kā六間仝集團ê公司新加入去烏名單，這个集團牽涉著賣毒品。目前猶koh有百外个個人佮團體佇美國ê烏名單頂頭，主要攏是佮軍方有關係。美國mā繼續禁止進口Myanmar ê玉仔。

美國自1988年開始對Myanmar ê軍事獨裁政權實施制裁。軍政府自2011開始民主改革，第二年美國解除一部份ê貿易佮投資禁令。舊年11月，Myanmar進行民主選舉，Nobel和平獎得主Aung San Suu Kyi領導ê全國民主聯盟（NLD）大贏，真濟美國企業就遊說政府對Myanmar全面取消制裁。

禮拜，Kerry佇Myanmar首都Naypyidaw佮Aung San Suu Kyi會談了後講，完全解除制裁ê關鍵是Myanmar愛繼續民主化、減少軍方ê影響力；毋過若無修改憲法，這就無可能。

2008年制定ê憲法保留真大ê權力予軍方，國會兩院有1/4 ê席次是軍方直接派代表，毋免選；國防、內政佮邊界事務三个部ê部長是軍方提名。Aung San Suu Kyi mā因為憲法專工針對伊設ê障礙，袂使選總統，伊tsit-má是外交部長、總統府事務部長佮國務顧問。

美國ê壓力毋是kan-na針對軍方，同時也要求3月底上台ê新政府改善少數民族Rohingya人ê處境。Rohingya人是蹛佇西部邊境地區ê Muslim，受著佛教徒主流社會壓迫佮排斥，無公民權，過了真悽慘。新政府mā無想欲沐這个問題。

人權運動者指出，毋但過去政府ê暴行無受著追究，軍方佇邊境對少數民族ê迫害koh咧進行，新政府ê作為mā無夠。佇遮的情形明顯改善以前，美國應該愛維持制裁，繼續對Myanmar有責任ê各方施壓。