【世界台】Trump和Putin行傷倚 無人有伊法？

頂禮拜，美國總統Donald Trump面對露西亞總統Vladimir Putin ê表現驚動自由世界。佇美國莫講民主黨，連共和黨mā有幾若位頭人批評伊傷害美國利益，毋過因為黨內tsit-má攏著靠伊，若像無人有伊法[1] 。伊邀請Putin秋天訪問白宮，紲落會按怎，真歹料算。

7月16拜一，Trump和Putin佇芬蘭首都Helsinki會談，佇會後ê聯合記者會，Trump呵咾Putin是「好ê競爭對手」，伊贊成Putin，講無理由認為是露西亞干擾2016年美國總統大選。

針對這个案件，美國ê特別檢察官Robert Mueller才拄起訴12个露西亞情報人員。記者問Putin敢會考慮共in引渡去美國受審，伊講愛由露西亞司法人員佇國內問案，美國會當派人來觀察，毋過條件是愛互相：有一件生理人偷走稅[2] ê案件，美國官員有牽涉，美國mā著調查，並且予露西亞派人出席。

Putin講ê這个案件，美國早就認定是伊迫害反對者ê手段，當事者ê一位律師十年前予露西亞掠去，死佇櫳仔內，美國國會為此koh通過制裁露西亞ê法律。Putin指控ê美國官員，包括前美國駐露西亞大使Michael McFaul。

Trump當場煞講這个提議足讚。過兩工，白宮ê發言人koh講總統猶未決定，會佮伊ê團隊討論。一直到拜四，白宮才宣佈無同意Putin ê主意，仝日參議院mā全員一致通過決議，反對予露西亞訊問美國官員。

想袂到，白宮煞宣佈欲邀請Putin來訪問。《衛報》ê分析講，Trump這步袂輸是共伊ê反對者比中指，mā表示伊相信家己koh擋過一改政治風颱矣。

Trump就任冬半以來，爭議有夠濟，一遍一遍後來攏無代誌，毋過這改特別嚴重，仝黨ê參議院外交委員會主席Bob Corker拜二講，「水壩總算欲崩矣，佳哉」。

事實證明無tsiah-nī簡單。Trump拜三「澄清」伊佇Helsinki只是講落勾去，伊是欲講「無理由認為『毋』是露西亞干擾大選」。這款解說，毋信ê人聽起來足譀古，毋過黨內ê批評就真正消風去。《衛報》引述一位學者講，一般ê選民袂看kah hiah詳細，支持者早就予反Trump ê媒體吵kah麻痺麻痺，小事講kah真嚴重，大事聽著mā無啥矣，in mā袂感覺Putin對in有啥物威脅。

對共和黨政客來講，既然基層對Trump tsiah-nī死忠，in mā著綴咧行，跳出來反Trump等於選舉自殺。

《紐約人》雜誌ê一篇文章mā指出，共和黨愛為著共同ê利益和價值，忍受Trump一寡和黨ê傳統無仝ê立場，包括保護主義佮國際盟友關係。In目前真 要緊ê，是支持Trump提名ê保守派法官Brett Kavanaugh通過參議院同意，進入最高法院。

11月初，美國就欲進行期中選舉。Putin敢真正會訪問美國，對選舉會有啥物款衝擊，是全世界攏愛足關心ê代誌。