【世界台】Pakistan新總理佮「深國家」

前枋球（cricket）明星Imran Khan準備出任 Pakistan ê新總理。佇7月25 ê國會大選，伊ê政黨 「Pakistan正義運動（PTI）」 拍破兩大黨傳統，頭一擺選贏。伊有個人魅力，喝反貪腐，koh有軍方共伨。佇Pakistan，軍方上有夠力，觀察者普遍認為軍方干政會加袂減。

今年65歲ê Imran Khan，少年時去英國讀貴族中學、入Oxford大學，後來成做枋球國手，1992年以隊長ê身份領導Pakistan隊提著世界杯ê冠軍，成為國家英雄。伊後來踏上政治路，1996年成立PTI，頭先無順利，一直到2013年大選，PTI才總算提著下議院一成ê席位。這改，PTI選牢直選議席ê四成捅，招小黨佮無黨ê議員組閣。

Imran Khan定定予媒體講是一个愛耍ê tshio-ko（playboy），伊煞主張保守Islam ê價值，比論嚴格ê褻瀆罪和傳統的婦女角色。伊koh講欲建立Islam式福利國家。

Pakistan自1947年獨立到今，軍事統治和民選政府相交輪，時間量其約一半一半，準做是民選政府執政ê時，軍方插手mā誠深。這改選舉，才是第二遍民選政府之間ê權力轉移爾，選舉mā誠爭議，軍方共Imran Khan鬥做票ê風聲颺颺飛。

過去幾若年，前總理Nawaz Sharif一直teh和軍方鬥爭。Imran Khan mā是積極反Sharif。Sharif是兩大黨之一Pakistan Muslim聯盟Nawaz派（PMLN）ê領袖，自1990年開始，無相紲做過三任總理，最近一擺是到舊年7月底，為著貪腐ê罪名予法院判定著落台，這個月初被判刑十冬，伊否認指控，月中對英國飛轉來赴監兼造勢。

英國BBC分析講，Sharif上早mā是受軍方支持上台，等到伊較有實力，欲行家己ê路，比論和印度改善關係、鎮壓一寡倚軍方ê武裝團體，就和軍方衝突，真濟人認為伊會落台入監，就是軍方共創空。Imran Khan以後若是政策踏著軍方ê利益，恐驚命運mā相siāng。

真濟媒體報導講著Pakistan軍方ê時，攏共稱呼「深國家」（deep state）。 這个名詞上早來自Turkey，這幾年特別時行，一般是講國家ê組織，比論官僚系統、軍隊、情報機關，照本身ê利益和意識型態teh運作，毋聽民選領袖指揮，啥人當選攏仝款。

這是一个負面ê詞，Turkey總統Recep Tayyip Erdoğan佇2016年共一場政變壓落去了後，就用這項指控發動大迫害。美國總統Donald Trump ê支持者mā宣稱聯邦政府內底有深國家teh和伊作對。

比起Erdoğan已經建立獨裁、美國 ê民主體制和傳統較健全，Pakistan ê軍方應該是上有資格叫做深國家。