【世界台】歐洲「聖戰」份子的威脅

發動11月13號Paris恐怖攻擊ê Islam國(IS)份子是啥物款人？Uì  in ê行為，會當看出啥物款ê IS策略？有專家警告，這馬只不過是開始爾爾，未來幾十年，歐洲ê城市會不時面臨危險。

德國《鏡》(Der Spiegel)週刊一篇專題報導引用德國官方講，這擺ê攻擊是標準ê IS模式：高層下令，由在地ê小單位單獨來執行。

遮ê小單位ê成員，是佇歐洲出世、大漢ê少年人。專家估計，這幾年來，西歐有大概4000个少年男女去到Syria佮Iraq參加IS。對其中ê真濟人來講，攻擊歐洲是足自然ê想法。

已經予警察拍死ê Paris事件主嫌  Abdelhamid Abaaoud，是佇Belgium出世ê Morocco第二代。根據情治單位調查，伊自19歲開始為著一寡輕罪出入監獄，三年前彼擺出來，才表現甲真有宗教意識，無偌久就走去Syria。

佇遐，伊佮其他來自Belgium佮法國ê人同齊編佇講法語ê單位。西方來ê戰士算IS ê菁英，待遇真好，有厝、有錢、有查某，欲愛啥閣會使共百姓「沒收」， 這是佇歐洲無可能ê生活。攻擊Paris ê計畫，可能就是佇IS ê法語單位內底發展出來ê。

報導講，目前已經知影ê Paris攻擊者攏捌佇Syria踮過，毋過重點是in攏是歐洲ê公民，「in是佇in成長ê社會內底來偏激化ê」。

法國ê Islam主義專家Olivier Roy佇《世界報》發表文章講，其實20年來，法國「聖戰」份子ê來源真固定是兩類人：Muslim移民第二代，佮改信Islam ê。

是按怎是這兩種人？In有啥物共同點？Roy認為主要是一種「世代ê反抗」，遮ê少年人佇文化佮宗教ê意義上反抗in爸母。移民第一代拍拚加入西方社會，少數ê第二代煞對序大人這點真不滿。In本底嘛無真正信教，為著反抗，才想欲「比Muslim閣較Muslim」，聖戰份子實際上是Muslim社群ê邊緣人。

Roy認為，是偏激份子去揣著Islam，毋是Muslim偏激化。毋過伊並無講這个問題愛按怎解決。