【世界台】美國民兵攑銃反聯邦

佇美國西部的Oregon州，一陣人攑銃佔領國家野生生物保護區的建築，已經十工。事件牽涉著反聯邦、土地權、武器權、種族主義等等問題，是一種真有美國特色的麻煩代誌。

這擺的事件，起頭是開牧場的Hammond爸仔囝進前放火燒著聯邦土地， 被法院用反恐的法律判刑五冬。這个案件的事實認定佮刑度攏真有爭議，Hammond家族有和平表達不滿。毋過，一陣攑長銃的民兵煞uì隔壁州Nevada走來，講欲來相伨， 頂頂拜六佔領一个保護區內底的一寡設施。

這陣民兵tshuā頭的人號做Ammon Bundy，今年41歲。In老爸Cliven Bundy前年佇Nevada州就因為放牛佇聯邦土地頂頭食草，和聯邦土地管理局衝突，動員武裝民兵佮官方對抵*，落尾是官方讓步。

佇美國西部的庄跤，有袂少人保持古早「開拓」時期的想法，in崇尚個人自由，包括持有銃的自由，怨恨聯邦政府管傷濟、佔真濟土地做國家公園抑是保護區。In主張遮的土地佮資源愛予私人開發。In佮環境生態保護人士是死對頭。

遮的人佇政治上算真保守的右派。民兵雖然佔少數，毋過佮反聯邦的運動結合，以「保衛土地」做理由，武裝對抗政府的事件，並無罕見。

《經濟學人》週刊分析，這个運動的性質，無影是浪漫的農村抗爭，實際上是一種激烈的反政府極端主義，部份成員閣表現出白人至上的種族主義。

有真濟人批評講，2014佇Nevada的事件，政府傷過軟汫，才予人軟塗深掘。這擺嘛猶無用著強制的手段。也有真濟人懷疑，若攑銃佔地的是烏人抑是Muslim，政府敢會遮爾客氣。毋過政府嘛驚若是用硬的，會來造成嚴重的傷亡。