【世界台】資料若石油 新時代社會經濟公平ê挑戰

這陣攏講資料就是新時代ê石油，像Google、Amazon、Facebook這種公司收集大量資料，就敢若早前有油田hiah-nī夠力，而且大者愈大。仝時陣，新科技恐驚會害足tsē人失業。欲án-tsuánn對付這款無公平ê趨勢？叫面冊提錢出來分予逐家啥款？

《金融時報》ê主編John Thornhill認為袂䆀。伊講，面冊上有價值ê資產，就是使用者無意中免費提供ê資料，這是集體創造ê資源，面冊若共伊uì tsia趁著ê利純，提一部份來貢獻社會，是拄仔好niâ。

其實是面冊ê執行長Mark Zuckerberg家己進前講著石油佮「全民基本收入」（Universal Basic Income，UBI）ê關聯。伊7月去Alaska，這个美國遙遠北方ê產油州，30外年前就成立一个基金，逐年共石油盈餘ê一部份，分予每一位州民。上好ê時bat一人領2000捅美金。

Zuckerberg真呵咾這个制度，伊強調這條錢是tuì自然資源來ê，毋是靠加稅，符合保守派ê小政府理念；這種特殊ê社會安全網會當予全美國做參考。

全民基本收入是這幾年真熱ê議題（【世界台】mā報導過），真tsē矽谷ê領袖攏leh設想。基本重點，就是未來機器人佮人工智慧會搶足tsē頭路去，人無穡頭通做，mā是愛生活，欲án-tsuánn？可能愛由國家來分錢。當然，錢uì佗位來，是大問題。

Zuckerberg ê話隨受著批判，《觀察者報》專欄作家Sonia Sodha講，面冊佮其他ê科技業霸主趁錢若水，卻想空想縫減納稅；Zuckerberg講著小政府，就是欲用基本收入來取代公共服務，毋是共補充；毋支持福利國家，koh 主張公辦ê基本收入，是假好心。

Thornhill進一步講，既然Zuckerberg欲改善社會，就莫kan-na喙講，應該趕緊成立基金，來進行全民基本收入ê實驗，而且愛鼓勵同業比論Google mā加入。

面對「資料石油」ê新勢面，mā有koh較激進ê論點，講愛共tsia-ê有壟斷傾向ê大公司國有化。《經濟學人》雜誌認為較實際ê 做法，是政府ê反壟斷機關，佇審查購併ê時，毋但看公司ê規模，著真重視牽涉著ê資料財產；另外，資料愛較開放分享。