【世界台】歐洲的難民囡仔去讀冊

舊年歐洲面臨二次戰後上大的難民潮，欲按怎予移民整合入在地社會，囡仔的教育是真要緊的一件代誌，愛予移民的囡仔有平等的發展機會，避免in未來成做社會經濟上的弱勢群體。這是歐洲真濟國家無簡單的挑戰。

這期《經濟學人》報導這个議題，講目前上大的問題，就是難民的囡仔傷過集中做伙。因為大部份攏蹛佇難民中心抑是移民社區，去附近的仝一寡學校。佇挪威、丹麥佮瑞典，有七成的難民囡仔去讀至少有半數學生是移民的學校。按呢會佮主流社會有相當的隔離，而且較僫學著當地的語言。

移民閣一般會蹛佇較散、教育的標準較低的所在，移民囡仔的學習表現定定會比主流社會的囡仔較䆀。

德國的技職教育時常予人呵咾，毋過這篇文章講，佇這个十歲就分做職業佮升學兩途的系統之下，移民囡仔比在地囡仔有加44个百分點的機率會行職業教育的路。真濟巧的移民囡仔，會因為在地語言無夠好，無法度入去大學。

文章講，移民的囡仔應該愛較分散佇無仝的學校內底，比論有的所在規定每一間學校的移民囡仔比例袂當超過兩成。而且愛幫助較濟移民囡仔去讀幼稚園。

世界銀行相關計畫的官員Christian Bodewig嘛表達類似觀點。伊講，難民囡仔需要特別的支持，像密集的語言課佮各種入門課，予in會當量早進入主流的班級；有的囡仔捌受戰爭的創傷，需要心理支持。在這以外，較納入（inclusive）的教育體系對難民囡仔較好，莫共in照出身來分類。

伊講，Syria難民危機無啥可能是一時的現象，照目前區域的情勢，凡勢難民潮會成做歐洲未來幾年的「新常態」，歐洲愛趕緊準備好勢，uì較納入的學校開始。