【世界台】電腦科技倫理佮大監控

資訊科技對人類生活的影響愈來愈深、愈闊，遮的領域內底的專業者，敢有想著in的工課，其實毋是中立的，定定牽涉著政治佮權力的安排？美國的加密學家Phillip Rogaway最近徛出來呼籲伊的同行發揮道德勇氣，阻止政府對人民的「大監控」。

Rogaway是加州大學Davis分校的電腦科學教授。伊12月初針對學界，發表演說佮文章，討論「加密學工作的道德性質」，起頭就用1950年代Albert Einstein等科學家警告核子武器的危險做例，提醒講科學家愛有社會意識。

伊講，佇電腦科學界，真罕得有人要意「社會責任」，講起這，顛倒會予人感覺足奇怪。逐家攏是提經費做研究，毋捌去考慮提供經費的是啥物單位、做的物件對大眾是好抑是䆀。伊最近面試一位教師候選者，彼个人當咧做的，是美國國防部贊助的「挖資料」的計畫，在Rogaway看來倫理上無啥妥當。伊問對方按怎想，對方煞真認真回答：「我是一个無靈魂ê身體」，無想著社會責任。

Rogaway講，伊家己是2013年的Snowden事件了後，才認真去思考大監控是偌嚴重的一件代誌。Edward Snowden本底是替美國國家安全局工作的電腦專家，伊黜破國安局主導的全球監控計畫，轟動世界，這陣伊猶咧國外走路。


Rogaway講，美國政府以防止恐怖活動佮犯罪做理由，欲不斷擴大對人民通訊的監控，實際上，in取得遮的資料，作用毋是按呢爾，in會用來對付異議者；若是異議恬去，社會的進步就免啥向望。

佇《大西洋》雜誌的專訪內底，Rogaway講，恐怖份子若是欲加密 in的通訊，猶是揣有法度，情治機關對大眾通訊工具加強監控，只是妨害著一般人民的通訊安全。

伊講，人若是家己的思想、話語、人際來往，攏隨時受著不管是真人抑是演算法的監控，彼種日子根本袂過得。伊勉勵加密學界的同行，愛發展有利保障人民權利的技術，拒絕和政府合作去監控人民。

英國的科技社會學者John Naughton嘛佇伊的《衛報》專欄主張「演算法設計師需要行為準則」。伊指出，毋但像面冊抑是Google這款網站會當決定你看著啥、看袂著啥，甚至影響選民的投票行為；銀行用演算法決定欲借錢予你無；佇美國的一寡城市，演算法甚至會決定啥物款的人佇街仔路較會予警察閘落來檢查。

毋過對大眾來講，遮的演算過程攏是烏箱，箱仔內底，是預設啥物款的價值、共人按怎分類，咱攏無法度知影。這是一種新的、獨斷的權力，「演算法權力」。

Naughton問，siáng愛為演算的決定負責？法律上可能是公司佮機關愛負，毋過寫程式的人，敢無道德的責任？伊呼應Rogaway的觀點，認為毋但是加密，軟體科技整體，攏無應該參真實世界的價值傷脫節。