【世界台】美國的兵源挑戰

美國總統Barack Obama月中宣布欲延長佇Afghanistan的駐軍，無欲照原本的計畫佇伊任期內底撤出。目前看來，美國用軍力介入世界的政策無改變，毋過這个政策拄著一種來自上基層的挑戰，就是：願意而且會當做兵的美國少年人傷少。

這期《經濟學人》週刊報導，1973年停止徵兵的美國，這馬招募人入軍隊誠困難，真歹達成目標。喝口號支持軍人逐家攏會曉，毋過真正加入的真少。

原因有幾若个，一層一層分析，美國這陣17至21歲的人口有2100萬，其中950萬連基本的學歷要求攏無符合。扣掉遮的，閣有700萬人因為各種原因無合格，比論傷過大箍、有犯罪前科、手抑是面有刺字等等。

賰落來的450萬，大概干焦39萬有意願，毋過遮的人，尤其素質上好的，真可能選擇去讀大學，或者是去別位食頭路。尤其這馬失業率低，外口機會濟，選擇做兵的就愈少。加上本世紀的Afghanistan佮Iraq兩場戰爭，美軍死5300外人、傷者幾萬人，美國少年人有驚著，加入軍隊嘛會較斟酌考慮。

軍方一方面提高待遇，一方面降低選人的標準。舊年，陸軍開始改變過去用利益引誘的廣告策略，改強調軍隊的價值，目前效果猶無明顯。

美國的戰爭攏佇海外，有偌濟是為著美國的重點利益不得已愛拍的、愛付出偌大的代價，隨時攏真濟爭論。這篇標題就叫做〈啥人來拍下一場戰爭？〉的文章講，兵源問題會限制美國未來投入戰爭的能力，有的戰爭會拍袂起。