【世界台】美中貿易戰路線 袂綴Bannon離開白宮

美國總統Donald Trump ê首席策士Steve Bannon頂禮拜五落台，仝一日，美國貿易代表宣佈對中國進行301貿易調查。一般認為，這顯示Bannon離開白宮，袂影響著伊主張ê佮中國拍貿易戰ê路線。

《金融時報》專欄作家Gideon Rachman講，佇真濟人眼中，Bannon代表三種戰爭ê威脅：貿易戰、美國內戰，佮世界大戰。毋過tsia-ê情勢毋是伊創造出來ê，伊只是共利用。Tsia-ê條件，mā猶原存在。

Rachman講，美國ê保護主義真有可能得勢，因為中國ê產業政策確實tng-teh威脅美國ê關鍵產業。「中國製造2025」計劃，按算欲用補貼佮配額ê手段，予中國佇上要緊ê領域佔贏。中國這種重商主義ê政策，會刺激美國mā採用重商主義ê對策，啥人做總統都仝款。

這改ê 301調查，是針對中國涉嫌偷盜美國廠商ê智慧財產。Rachman講，這項調查會真了時間，毋過可能會激化美中ê衝突。Trump ê貿易團隊，猶是由主張對中國強硬ê人所領導，包括貿易代表Robert Lighthizer，佮白宮國家貿易委員會主任Peter Navarro。

Bannon佇落台前幾工，敲電話予自由派ê媒體《美國展望》，講「和中國ê經濟戰就是一切，咱愛若起狂仝款，規心拚這件代誌」。

美國政治學者Walter Russell Mead分析，雖然Trump政府ê外交、國防、國家安全高官ê目標猶是欲維持二戰後以來美國主導ê世界秩序，毋過一方面世界情勢ê挑戰愈來愈大，二方面，美國大眾佮總統本人攏對傳統ê做法有憢疑。

在Bannon ê觀點，傳統秩序ê機構，比論世界貿易組織（WTO），已經予中國看破跤手。中國已經學會曉利用tsia-ê制度，來打擊美國ê利益。為著佇已經無仝款ê競爭內底對付無仝款ê對手，美國愛行全新ê路線。

Bannon離職了後，隨轉去伊進前領導ê「Breitbart新聞」，伊會繼續用這个媒體向大眾訴求，來影響政策。Mead講，Bannon準備欲佇明年佮2020年ê國會和總統大選，予對外政策成做關鍵議題。照伊過去動員民意ê表現，伊ê影響力袂當看輕。