【世界台】露西亞ê Syria計畫

露西亞最近加強對Syria政府ê軍事援助，講是為著拍Islam國(IS)，而且招西方加入，其實擴張本身勢力ê意圖真明顯。

《紐約時報》ê一篇投書分析，露西亞總統Vladimir Putin想欲共西方佮眾Arab國家搝入來組一个反IS ê大聯盟，內底包括露西亞、Syria總統Bashar al-Assad ê政權佮Iran。這个聯盟欲取得聯合國安全理事會ê授權。

透過這个方式，露西亞欲支持Assad政權繼續統治。Putin嘛欲趁這个機會和西方交換條件，向望西方取消進前因為Ukraine ê戰事來對露西亞進行ê制裁、恬恬承認露西亞併吞Crimea佮控制Ukraine東部ê現狀。



作者講，西方真需要露西亞佇中東來合作，對露西亞來講，這是西方ê弱點。若是露西亞ê計謀成功，世界秩序會照有利伊ê方式來重寫。

露西亞佇地理位置重要ê Syria有真濟利益。Assad家族政權從冷戰時代就是露西亞佇中東上峇ê盟友，露西亞ê武器輸出、移民佮投資攏真可觀，Syria ê港口Tartus有露西亞佇地中海唯一ê海軍基地。若是西方反對ê Assad倒台，這一切恐驚攏會無去。

刊佇《衛報》ê一篇評論講，Assad佮IS會使講是互相牽成。Assad希望世界共Syria情勢看做是伊佮IS雙方ê相戰。在IS來講，會當宣傳講in是保護Sunni派教徒免受著Assad政權屠殺，按呢來招募愈濟人加入。

Putin預定9月底欲佇聯合國大會發表演說，推銷伊ê計畫。這篇文章呼籲西方毋通中計，若是壯大Assad這个屠殺平民ê兇手，Syria ê流血會愈嚴重。