【世界台】Obama訪問東非兩國

美國總統Barack Obama這幾工訪問Kenya佮Ethiopia兩个東非國家。評論者講，Obama佇過去六年外的任期內底，無夠重視非洲，這擺訪問是真好的機會，佇發展商業佮合作反恐的同時，嘛和中國競爭佇咧這塊大陸的影響力。

Obama訪問Kenya，上蓋受著注目的話題，就是這是伊就任總統以來，第一遍來到伊的阿爸的母國。Kenya民眾熱情歡迎，甚至共伊看做若像出外的兄弟光榮倒轉來。

《經濟學人》週刊講，比起前兩任美國總統，Obama對非洲的作為實在無濟。Bill Clinton的時代制定法律，予濟濟非洲的產品免關稅輸入美國。George W. Bush成立「千禧年挑戰公司」，推動非洲的市場經濟改革，另外閣大力協助非洲對抗愛滋病。

文章講，Obama對遮的政策只是被動來延續。伊是有發起新的計畫來增加非洲的發電佮供電系統，毋過到今猶是講的比做的較濟。

以整個非洲來講，中國早就是上大的貿易對象。中國佮非洲的貿易量，是美國佮非洲的三倍。Kenya現在閣是非洲經濟成長上緊的國家之一。美國的政商界真著急欲擴大in佇非洲的實力。

Kenya總統Uhuru Kenyatta佇2013年當選，進前國際刑事法院以戰爭罪共伊起訴，理由是2007年大選了後的動亂當中，伊涉嫌主導部分屠殺。彼場動亂估計有1300人死亡。毋過檢察官佇舊年底宣布，因為Kenya政府無合作，證據不足，只好撤回起訴。按呢的結果，才排除掉Obama來訪的一个障礙。

Kenya嘛受著恐怖主義的嚴重威脅。伊的鄰國Somalia長期動亂，過激派的Islam組織「青年軍」（Al-Shabab）時常侵入Kenya發動攻擊。今年4月佇東北部一間大學刣死150人；前年佇首都Nairobi的一間商場刣死67个人。

Obama這擺的東非行程，也受著人權團體的關切。因為Kenya佮Ethiopia的人權狀況攏真䆀。Obama佇Kenya有當面呼籲Kenyatta總統共同性戀合法化，毋過後者嘛當面拒絕。

Ethiopia閣較譀，國會議員無半个反對派的，而且政府真嚴厲打壓異議者佮新聞記者。Ethiopia佮國際的新聞自由佮人權團體要求Obama愛提出遮的議題。