【世界台】行出日本安保論爭的困境

日本國會這站咧審議加強美日同盟的新安保法案。這種議題，日本的左右派長久有規套不變的立場，若像攏無交集，學者Watanabe Tsuneo最近講這是無營養的論戰，伊提出混合的主張：日本愛改善防衛體制，同時反省歷史。

Watanabe Tsuneo（渡部恒雄）是智庫東京財團的高級研究員。伊頂禮拜佇新聞網站Webronza發表文章講，現此時的東亞，是中國就像1930年代的日本彼款，大量增加軍備，有擴張領土的野心。

面對這款情形，日本佮同盟國一方面愛維持和中國的軍力平衡，保護自身安全，但是嘛愛避免軍備競賽反倒提高衝突的風險，所以談判縮減軍備嘛有必要。

以現狀，Watanabe講，日本的軍費長年相對穩定，若是法律體制繼續「過度節制」，對區域的和平「凡勢毋是一个合理的選項」。

日本總理Abe Shinzo（安倍晉三）的政府佇舊年7月透過解釋憲法，承認「集體自衛權」，比如盟友美國若是受著攻擊的時，日本就會使出手相救。反對者認為這破壞和平憲法，會害日本捲入戰爭。

Watanabe支持集體自衛權，伊認為日本已經共自我防衛的雙手縛甲絚絚絚，現在的修法只是改善防衛，是正當的。只是嘛著考慮著別國的想法。

這就牽涉著日本過去侵略佮殖民歷史的問題，Watanabe認為， 日本強化自衛力，中國佮韓國會感覺不安，嘛是正常的。日本的領導者應該表現適當的歷史觀，避免刺激鄰國，Abe總理對參拜Yasukuni（靖國）神社愛「自制」。

簡單講，伊建議的政策組合是：加強美日同盟，整備防衛力，承認集體自衛權──以上是保守派贊成的；毋過同時愛放棄共過去正當化的自私的歷史觀，對鄰國「再保證」日本無軍事野心──這閣較倚自由派的立場。所以伊自稱這是「混種」的意見，伊閣批評日本的媒體傷過兩極化，伊這款的聲音真歹出來。

Watanabe講，日本一向的「和平主義」，只是盡量莫沐代誌的「孤立主義」。現在日本若是欲行出來承擔較濟責任，毋但美國，東南亞一寡國家嘛支持。日本的保守佮自由兩派攏應該挕掉感情用事的固執觀點，認真討論新的區域現實。