【世界台】教宗成做左派領袖？

教宗Francis  6月18號發佈「通諭」，呼籲世界共同對抗氣候變化。不只如此，伊真大力批評追求「短期佮私人利益」的消費主義，甚至予評論者寫講「羅馬天主教廷這馬是一粒一的資本主義批判者」。



這句是英國《衛報》專欄作家Giles Fraser的理解，伊嘛是一位英國國教的教區牧師。伊閣寫講「當左派佇全世界失去權威，教廷再次講話有聲」。

教宗的通諭英文版有3萬7000外字。照Fraser的摘要，人類受著濟濟的慾望驅動，資本主義欲來滿足遮的慾望，無去區分啥物是人真正「需要」的、啥物只是人「想欲愛」的，這二項的差別比如救命藥仔佮電動 tshit-thô-mi̍h。「市場」不管這，對伊來講攏是「選擇」；市場嘛無欲管各種選擇對公共利益抑是地球生態有啥物款影響，干焦欲盡量擴大選擇。

過度消費的後果，就是地球變做一个糞埽桶。面對這个問題，經濟學家一般無啥路用。地球是有限的，毋過主流的經濟模型攏假設成長會當無限 。教宗的呼籲，就是人類袂當直直痟貪落去，愛知影撙節。

通諭內底無直接用著「資本主義」這个詞，毋過真濟擺點名「市場」，比如：「市場神奇的觀念認為增加公司佮個人的利益，就會當解決問題，咱愛拒絕這種想法」、「為著欲賣產品，市場傾向促進極端的消費主義，使人真容易牢佇無必要的開錢買物的循環之中」。

《衛報》的社論講，這是百年來上蓋予人想袂到、嘛可能是上蓋有氣魄的教宗文件，毋但是對天主教徒抑是基督教徒講話，嘛是講予地球上每一个人聽。

毋是每一个人攏會聽，美國共和黨佮石油界的幾若位頭人就隨反彈矣。總是，以教宗的地位，對拖棚的聯合國氣候談判會當發揮偌大的影響力，猶是真受著期待。