【世界台】同性婚合法化 閣來看澳洲

Ireland頂個月公民投票通過同性婚合法化，鼓舞著世界上的同性戀人權運動，紲落幾個月，澳洲凡勢嘛會變天。國會預定佇年底以前投票決定 。目前，大部分民意支持同性婚，只是國會議員真濟猶閣咧觀望。

領導保守聯盟的澳洲總理Tony Abbott本人反對同性婚姻，毋過贊成開放伊的自由黨的議員照家己意思投票。只不過這閣牽涉著聯盟內底其他黨派的意見。若是真正開放投「良心票」，通過修法來承認同性婚的機率會較大。

在野的工黨，絕大部分議員攏支持同性婚。進前綠黨佮Abbott的自由黨同事攏已經提出支持同性婚合法的法案。6月初工黨閣提出一案，被批評是欲來割稻仔尾，顛倒會拍歹共識， 變成政黨相爭。澳洲廣播公司（ABC）的一篇分析文章講，若是會當閣撨出一个跨黨派的第四案，莫一黨一案，改革較有贏面。

頂年7月，一間研究公司Crosby Textor做的民調講，72%的澳洲人支持同性婚合法化。這个比例比十年前成長強欲一倍。

國會議員咧？英國《衛報》的澳洲版最近一个一个訪問下議院全部的150位議員，若是開放投良心票，in的立場啥款。頂禮拜三公布結果，有63位贊成同性婚合法、40位反對，毋過猶未決定抑是表態的人數真濟，有47位，到時的輸贏猶閣真歹講。

既然支持改變的民意超過七成，是按怎政治人物猶閣綴袂著？前述的民調公司負責人對英國廣報公司（BBC）講，一寡議員對保守勢力驚惶過度。伊講：「保守的基督教團體吵甲真大聲，毋過講到底in是真少數，無啥要緊。」

工黨的副領袖Tanya Plibersek嘛講，並毋是所有天主教徒攏反對同性婚。

佇咧爭論當熱的這時，有一對結婚已經十冬的翁某宣布，若是國會通過同性婚合法，in就欲來離緣表示抗議。蹛佇首都Canberra的Jensen夫婦講，若準國家欲改變婚姻的定義，去納入同性的關係，婚姻就不再是符合上帝旨意的神聖制度，in無愛參加彼種新的定義。

澳洲國會捌佇2012年表決同性婚合法化議題，贊成派輸甲真悽慘。ABC的分析認為，以現在國內外贊成派的氣勢，這擺會真無仝，最有利的狀況，上緊可能佇8月就會過關。