【世界台】免錢的上貴 面冊拜託收我1箍

人講免錢的上貴，這佇現此時的網路世界來講，真有道理。像Facebook、Google遮的各種的網路服務，免費予咱使用，其實in是欲收集咱的資料、掌握咱的行為，這就是咱付出的代價。敢講逐家攏無要無緊？抑是無伊法度？



最近美國拄好有一寡新的研究。Pew研究中心調查發現，93%的美國人認為，家己會使決定「啥人」會當提著in的資訊，對in來講是重要的代誌。九成認為，決定「啥物」資訊予人收集，是重要的。

毋過同時，真少人相信in予人收集的紀錄會當保持祕密佮安全。干焦有7%的人對網頁頂刊廣告的廠商有信心、11%對家己使用的社交媒體有信心。

另外，Pennsylvania大學調查大眾是毋是願意為著一寡小利來犧牲隱私。比論講，若是廠商打折予你，同時佇你毋知的情形下收集你的資訊，這敢是公平的？有91%的受訪者回答無同意。

研究的主持學者Joseph Turow講，民眾毋是真正自願為著小可好處，來交出個人資料。「實際上是一種放棄的心態。美國人感覺，廠商按怎處理抑是收集in 的資訊，in無法度控制。」

講著收集使用者資訊，Facebook（面冊）是世界厲害的怪物。學者Zeynep Tufekci最近投稿《紐約時報》講，伊甘願付費使用面冊，共家己資料的主控權挈倒轉來。

社交媒體等免費網路服務的大問題，Tufekci指出，就是以廣告為財源的商業模式。為著賣廣告，面冊操控著啥物會出現佇咱的主頁、啥物袂。這已經「扭曲咱佇線頂的互動。」

尤其單純的貼廣告已經趁無錢，所以社交媒體愈來愈需要瞄準個人，共可能對in有效的廣告分別㧣予in，這就表示愛分析使用者的資料、追蹤in的行為。

雖然面冊趁真濟錢，但是Tufekci引用網路專家Ethan Zuckerman所講，面冊一個月平均uì每一位使用者，才趁著美金2角，這表示靠廣告支持的模式嘛已經行袂通矣。面冊應該愛開放予使用者付費，伊相信有幾若億的用戶佮伊仝款，願意逐個月付1箍美金，「做一个消費者，毋是一項產品。」

毋過話講倒轉來，遮的免費網路服務，嘛毋但是趁廣告爾爾。這幾年來，巨量資料佮人工智慧的科技發展的速度驚人，真要緊就是靠網路使用者上傳的濟濟的內容。《經濟學人》5月中報導舉的例之一，是兩種有夠sio-siâng的狗，Microsoft咧研發的一種個人軟體，已經會曉共你講佗一隻是佗一種。

未來，個人資料佮紀錄的收集佮利用愈來愈厲害、愈複雜，個人對本身隱私的主控權，恐驚是愈歹掌握。