【世界台】爭議的Trump 總統路會行偌遠？

美國大業戶Donald Trump爭取共和黨提名選總統，民調繼續領先。伊的言論真雄，煞吸引著各種背景的人共支持。這个聲勢，已經予濟濟本來當做咧看戲的觀察者真正煩惱。

就親像《經濟學人》週刊半滾笑講的，無人會願意這个怪人近倚核子武器的開關鈕仔。佳哉，若照這本雜誌的分析，這袂發生。

Trump的口號講伊「欲予美國再度偉大」，伊對移民佮外國的言論予人懷疑這敢是現實世界。伊欲佇美國佮Mexico中間起一堵壁，阻擋伊講「食毒的、犯罪的、強姦的」Mexico人，而且經費欲叫Mexico出。伊講欲趕走1100萬非法移民，甚至是in佇美國出世、有美國籍的後代。

伊閣講每一个參美國做生理的國家，攏咧偷提美國的錢。伊欲派地面部隊去共Islam國控制的油田搶過來，守予牢，永遠為美國所用。毋過伊欲減少對歐洲、日本佮韓國的軍事支持，講in愛靠家己。

針對移民，Trump比所有的共和黨競選對手閣較強硬，毋過伊閣毋是典型的右派。伊批評大企業頭家徙廠出國，害美國人無頭路；伊欲對趁大錢的避險基金業者加稅，這受著基層的歡迎。

《經濟學人》講，Trump吸引著種種不滿現狀的人，伊民意基礎的重點，毋是死忠的保守主義，是強烈的憤怒[hùn-nōo]。文章講，這種熱狂會退去，準做Trump正經予共和黨提名，嘛提袂著倚全國一半的選票，來當選總統。

Trump袂當選，是目前主流的看法，重點之一是伊反移民的立場得失大量的Hispanic人口。毋過，一位長期的共和黨謀士Bruce Bartlett最近投書《Washington郵報》，竟然建議Trump會當操作Hispanic人佮烏人的矛盾，來爭取勝利。

伊的邏輯[lô-tsi̍p]，就是Hispanic移民搶烏人的頭路。大多數烏人一向支持民主黨，毋過共和黨若是正面對烏人訴求移民的威脅，凡勢有法度挖真大塊烏人票過來，就無需要Hispanic票。這種論點，當然嘛予人批評是使弄弱勢族群衝突，真無道德。