【世界台】種族屠殺的教訓

近代歷史上發生過一場閣一場的種族屠殺，這使咱有一个閣一个的紀念日，頂個月4月拄好特別濟。仝時陣，佇世界的幾若位，屠殺猶是當咧進行。人類敢真正有學著教訓？是按怎會予這種代誌繼續來發生？

這是美國資深記者Christian Caryl所寫，頂禮拜刊佇《外交政策》雜誌網站的一篇文章內底問的問題。

Syria四年的戰爭已經死超過20萬人，將近1000萬人逃難。一爿有總統Bashar al-Assad，一爿有過激派的Islam國，攏咧屠殺宗教上的異己。

Congo民主共和國、中非共和國、南Sudan嘛才經歷過大規模的暴行，目前衝突的根本原因也猶未解決。Sudan政府也繼續佇Darfur等所在殘害少數族群。

Myanmar政府迫害信Islam教的Rohingya人，有西方觀察者甚至認為已經出現種族屠殺的早期影跡。

Caryl引用學者Paul Stares的講法，現在，媒體的全球化，加上行動資訊科技的普遍，大規模的暴行愈來愈歹掩崁，真緊就傳遍世界。按算欲使用暴力的統治者，也因此著較考慮後果。

另外，自1994年的Rwanda種族屠殺了後，國際上已經建立一寡機制，來介入阻止抑是制裁暴行，比如國際刑事法院。美國也佇2012年建立跨部門的委員會，共防止暴行當做重要的外交政策目標。

Stares只是舉出相對的進步，伊承認猶閣有真長的路愛行。但是Caryl更加不樂觀。國際刑事法院佇2009年起訴Sudan總統Omar al-Bashir，毋過伊嘛是拋拋走。舊年底，檢察官煞宣布暫停調查，批評聯合國安理會無作為，無法度掠Bashir歸案。

總講，Caryl認為，雖然咱這馬對種族屠殺了解有較深矣，毋過現實是: 有能力去介入阻止的國家，若是認為按呢做會害著家己的利益，就無想欲插矣。強權互相敵對，無法度一致行動，在40年前的Cambodia如此，在這時的Syria也是仝款。這个大問題無解決，講欲予悲劇「永遠不再」，就只是口號。