【世界台】核武戰爭的危險當咧升高

8月6號、9號分別是Hiroshima（広島）佮Nagasaki（長崎）受著原子彈轟炸的70週年紀念日，當此時，世界閣再發生核子武器攻擊的危險嘛咧升高，有知名專家警告，「若是閣度過70年無另外一个Hiroshima，算咱好運」。

這是Richard Haass 6號發表佇《金融時報》的文章的標題。伊是美國智庫「外交關係協會（CFR）」的會長。未來佗位上有可能發生核戰？敢是延續美蘇冷戰、這站為著Ukraine等代誌，對立真緊張的美國佮Russia之間 ？

Haass研判毋是，伊講，五个正式的核武強權，美國、Russia、中國、英國、法國，動用核武的可能性上低，主要是遮的國家佇情報佮外交方面較有經驗，誤判情勢的機率較低。

上可能使用核武的，在Haass看來，是取得核武的歷史較短的國家，第一危險的，是Pakistan。伊佮死對頭印度若是開戰，傳統兵力較弱的Pakistan有動機先使用核武。另外，Pakistan內部無穩定，核武有可能去予恐怖份子提著。

閣來是北韓，不穩定的因素包括政權發動對外攻擊、國家內部崩敗，抑是政府傷欠錢，共核武抑是重要原料賣去國外，攏有可能引發核戰。

未來70年核武競賽的熱點，是佇中東。Israel已經有強大的核武。Iran的核子問題雖然最近達成協議，毋過長期袂當保證伊一定袂行向核武。仝區域內底的Saudi Arabia等幾若國，嘛有可能跟綴。

今年3月初，《經濟學人》週刊就捌用「新核子時代」做封面主題。仝款煩惱新興的核武國家，作者對Russia閣若無像Haass遐爾放心，認為Russia想欲以核武來改變地理政治的現狀，甚至佇Vladimir Putin總統以後上台的國族主義者領袖，無定會比伊閣較危險。

欲按怎？這篇文章講，上要緊的就是限制核武的談判。以冷戰時代的例，只要有談判，雖然是敵人，嘛會當透過互相了解，來促進穩定。上䆀的就是無對話。世界需要正面處理愈來愈嚴重的核武威脅。