【世界台】Hillary Clinton欲終結大量監禁

佇美國Baltimore種族暴動當炎的時，爭取民主黨提名參選總統的Hillary Clinton宣示欲「終結大量監禁的時代 」。美國20外年來刑事政策過度依賴監獄，後果尤其不利烏人。Clinton想欲共這个政策反輾轉，行向佮影響真值得關注。

大量監禁，是一个真特殊的美國現象。有偌恐怖？就親像Clinton 4月29佇紐約的Columbia大學這場演說講的，全美國有超過200萬人佇咧關。

1/3的烏人男性，一生中會入櫳仔至少一擺。

美國人口佔全世界無到5%，毋過伊的監獄人口佔全世界監獄人口的25%。

這造成的，毋但是監獄傷kheh、費用傷懸、管理困難爾爾。遮濟人去關，對in厝內的衝擊是啥款？in中斷的人生欲按怎？Clinton講，囚犯內底真大部分只是犯輕罪的，「共in關起來，無啥會降低犯罪，顛倒真會拆散家庭和社區」。

閣加上因為規个體系的偏見，烏人坐監的機會遠遠比白人較大、刑期較長。

遮的問題毋是新聞，專家學者佇十幾年前就捌警告過矣，只是美國跨黨派的政治風向就按呢吹。講來，造成大量監禁的關鍵，是1994年的刑事法，這是Hillary Clinton in翁Bill Clinton做總統的時簽署的；主導擬定的，是彼陣的參議員、現任的副總統 Joe Biden。

Hillary Clinton佇這時陣做這个宣示，Slate新聞網站的評論家Jamelle Bouie認為真有時代意義，尤其Clinton共終結大量監禁連結著更闊的社會不平等問題，佮警察改革，包括主張警察出勤的時，身軀著安攝影機，記錄in佮執法對象的互動，這是人權團體一再要求的。

若是以政治利害的觀點，Bouie分析，這表示Clinton這馬更加需要烏人選票、需要Barack Obama總統的支持者。

毋過真正重要的，照Bouie講，是預料會予民主黨提名的Hillary Clinton已經共警察改革寫入政治議程，這是一个有力的信號，會發動伊的政治盟友來跟綴伊的領導。伊若是當選，嘛會被要求實現承諾。對警察改革來講，這已經是一个勝利。