【世界台】Putin用對抗固權力

以下這篇短文，是用教育部公布的臺灣閩南語標準用字寫成。一點都不難，只要認得中文（還用說，不然怎麼讀到這裡）、略通台語， 其實就懂八九成了。還有聲音檔唸給你聽，好多字詞也超連結到教育部《臺灣閩南語常用詞辭典》。看世界新聞，兼學台語文，就是【世界台 ~ Sè-kài Tâi】啦！

Russia總統Vladimir Putin不斷升高佮西方的對抗，毋過這可能失去控制，顛倒害著伊家己。這是《經濟學人》週刊一篇最新文章的觀點。以下是這篇文章的摘要。

舊年底，西方制裁加上油價大落，嚴重打擊Russia的經濟，伊的貨幣rouble對美金的匯率半年間落一半。毋過這馬看來，Russia的經濟並無像彼陣一般預測的遐爾䆀。Rouble的價值也漸漸回升。對Putin來講，這代表伊強硬對抗美國佮歐洲，得著勝利。



照Russia官方的論點，西方當咧對Russia發動全面的攻擊。國營電視台講，歐洲聯盟（EU）是靠重分配uì前蘇聯共產集團的崩解所取得的利益，來發展起來的，毋過，來自東歐新市場的利益已經漸漸焦去，歐洲只有繼續向東擴張，佳哉Russia已經阻擋這个擴張。歐盟失去新的財富來源，真緊就會倒。

最近幾個月以來，Russia毋但多次派軍機逼近歐洲國家的邊界，閣幾若擺唱聲欲使用核子武器。分析家講，目前，發生核子戰爭的風險，已經來到自1962年Cuba飛彈危機以來上懸的程度。

Putin激化對抗的目的，其實是確保伊家己掌握國家的權力。分析家講，前幾年以來，Russia國內的中產階級不滿Putin的權貴統治集團，要求較好的社會政策，in的不滿閣佮來自散赤庄跤的不滿會合，對社會穩定造成挑戰。

Ukraine危機發生後，Russia舊年3月併吞Crimea半島，升高國族主義，成功來壓制國內原本的不滿，加強Putin統治的合法性。

Russia若是真正佮西方開戰，嘛會真食力，毋過伊用威嚇的方式，只要西方有表現出任何弱點，對伊來講攏是一種勝利。

這種情形下，Ukraine的戰事，以及Russia佮西方之間的對抗，若是繼續，就對Putin的國內聲望較有利。

不過，Putin政權這款做法，就敢若吸麻藥仝款，過量會無法度收煞。無定有一工，國內的不滿，會閣共目標uì國外轉倒轉Putin身上，因為政府宣傳之下的美國負面形象，拄好就反映Russia的現實。

 

• 特色圖片"Vladimir Putin - 2006"由 Kremlin.ru。使用來自維基共享資源的知识共享署名3.0條款授權。