【台文話藝】假 mā ài 假- -出-來！

郭力昕所寫 ê 1 篇文章：〈強勢語言文化裡的「偽理性」――從龔濟（張作錦）的一篇投書文章談起〉，hōo 我想 beh koh 對進前 bat 講- -過 ê 主題 koh ke 話。

我想 beh uì hit 篇文章引- -ê，是單單 tsit 句：『強勢語言文化裡的偽理性』，作者講著 tuann-tiah ê 強勢語言 (『字正腔圓的華語』)，tī 都市 ê 中產階級 kap「受過高等教育 ê 人」心- -ni̍h，已經產生「理性」kap 「水準」ê 形象，mā hōo 顧面桶 the̍h 來做 in ê 政治本，suà 接 teh 損 tn̄g 咱起國 ê 理想 kap 母語 ê tshui 行。（ps. 我講「受過高等教育 ê 人」，無講「智識份子」，因為我 lia̍h 講 tsē-tsē 有受高等教育 ê 人，in ê 思考能力 kap 資訊 tsih-tsiap，根本無「智識份子」ê 資格！）

請 ta̍k-ê 認真思考咱 ê 母語行銷，針對無仝 ê 「消費者」，咱必須 ài 用「無仝 ê 包裝／產品」來做「生理」，tsiah 有可能 hùn 大咱 ê 市場佔有率，kā 目今 ah 霸 koh tshàng-tshiu ê 對敵 ián hōo 倒。

當然，任何 ê 語言本身並無高雅 kap 鄙猥 ( pí-uì ) ê 區別，重要 ê 是，咱 beh 按怎 kā 咱 ê 母語（咱 ê 產品）kā 包裝 hōo「雅氣」、「高級」，kā hiah-ê siànn-khiat ê 都市中產階級 kap 高等教育者 siânn- -過-來，thang 突破現此時 ê 行銷困境！！！是按怎？真簡單，因為 tsit 兩陣人，m̄ 管咱是看 in 有 iah 看 in 無，in 就是 tsit-má 思想言論 kap 社會文化 ê 主導者，咱拐 mā ài kā 拐- -過-來，tsiah 有成功 ê 希望！！！

請 ta̍k-ê 想看 māi，Microsoft 是按怎透過行銷策略，kā 明明產品比 i khah 好 ê Apple phah kah 倒頭 tsai- -ê？有好 ê 產品，suah 激頭腦輸- -人，假雅氣輸- -人，m̄ 管賣 ê mi̍h-kiānn juā 好 tú juā 寶，出尾 mā 是輸 kah 直 liù-liù，輸 kah hông tshi̍h leh thôo-kha 食 thôo！

Kā Apple ê 例 koh 講- -lueh，前 tsi̍t-tsām-á，Apple koh 靠 iPod 翻身- -a，請問列位，he kám 是因為 iPod ê 路用真正足厲害，別人 lóng 做 bē 出- -來？M̄ 是- -oh，he kāng 款是靠「設計」、靠「行銷」、靠爭取消費者 ê 「感覺、認同 kap 支持」tsiah 變 kah hiah 搶市- -ê，任何生理人、運動者若無 tī tsit 點覺悟，就無可能 koh peh 起！

除去咱原底 ê 路線，台語必須 ài 行出另外 1 條路，1 條有法度吸引都市中產階級 kap 受過高等教育者 ê 路。

咱大部份人 lóng 真 kah 意台語老歌或者是目前主流 ê 台語流行歌，m̄-koh 咱 bē-kā-kin tio̍h 承認：tse 已經無法度 koh hùn 大咱 ê 市場- -a！

為著行銷母語，咱 ài 看時勢，假 iànn 做目標者 ê 雅氣，thang kā 人吸收來咱 tsit pîng，按呢 tsiah 有可能去爭取大多數人，了後 kā in 變做愛母語 ê 人。

Koh 舉 1 ê 例，我看 Chuniok 兄去 hip- -ê 台灣國家文學館 ê 台語文學展開幕典禮錄影，我就有 1 ê 感想：「tsit-ê 典禮 ê 節目，是 1 ê 行銷失敗 ê 例。」 Tse 當然 m̄ 是講 hiah-ê 台語歌曲無好聽，咱認 bat 母語 ê 人合該然是足 ài 聽，問題是拙者請教列位：hit 類 ê 歌唱表演，hit-ê 節目性質，kám 有法度吸引 hiah-ê 無知 koh 虛華 ê 都市中產階級、少年人 kap 高等教育份子？？？我敢講：無可能！因為錄影- -ni̍h 大部份 ê 表演形式（除了吟詩 lia̍h 外），lóng 已經 hông 貼 1 ê 標籤：「中下階層 ê 娛樂水準」。

M̄-thang 誤會是我本人 kā hiah-ê 表演內容看無目地，hiah-ê 表演內容「事實上」是一等一- -ê，我所強調- -ê，是咱 beh 按怎爭取原底無屬 tī 咱 ê 人！按怎去 hōo in 目 tsiu 金- -起-來，uá- -過-來，有機會 hōo 咱影響 thang 變做咱 kāng 陣 ê 人！咱無必要 kā 咱自底 kah 意 ê 活動內容放棄，m̄-koh 咱 ài 斟酌想：咱 tsit-ê 活動 ê 目的是 siánn-mi̍h，若是 beh 行銷，咱 tio̍h 做 kuá「非我類- -者」ē kah 意、有趣味 ê 代誌，按呢 tsiah 有事使！！！Mā tsiah beh 直直做，piànn 勢做，結果 kan-tann 做 hōo ka-tī 爽、目標群體 suah 連 hiù to m̄ hiù- -咱。

比論蔣為文教授 tsit-tsām-á teh 規劃 ê 「用台語寫情批」，tse 就是 1 ê 真好 ê 創意，因為 i 有機會吸引 tsē-tsē 對台語無興趣 ê 少年人 ê 注意！（當然咱 bē-sái koh kan-tann 是 ka-tī ê 人互相寫 hōo ka-tī 爽，ài 爭取外口 ê 人！）

列位先進，咱是 teh kap 1 ê「語言／文化 ê 霸權」 teh 相戰，咱必須 ài「親像蛇 hiah-ni̍h 靈巧」，對敵 beh 假高尚、假水準，咱 mā ài 有本等來比高尚、比水準、比幼路！重 koh 來定位咱 ê 母語產品，行出 1 條無仝 ê 路，按呢，tsiah 有戰贏對敵、復振母語 ê 希望！