【台文話藝】低路 ê 國際觀

Tī 奇摩新聞看著 tsit 篇《聯合報》ê 報導：外國背包客 被台鐵整慘了。心內感覺怪奇，tsiah-ê 記者 kap 提出建議 ê 專家，是 m̄-bat 出過國、或者是無去過 juā 濟國家 ê 款？！

根據新聞內容，因為外國觀光客來台灣上興- -ê 活動內底，有 1 項就是坐台鐵去地方 ê 鄉鎮做在地旅遊，m̄-koh 因為台鐵 ê 車票、號頭等等 lóng 無英文，害外國人 sńg kah 真艱苦。

有影騙鬼 bē 食水！騙人 leh m̄-bat 出國！Tann 借問 leh，日本 JR ê 車票 kám lóng 有英文？車頭 kám lóng 有英文說明 kap 英語放送？賣票機 kám 有英文介面？In 按呢若講 ē 通，日本 ê 觀光 thang 知死- -a！定著已經大大受著損 tn̄g tsiah tio̍h，因為西方人 beh tī 日本做 backpacker lóng ē 艱苦 tsē-kuà，無人想 beh 去日本 tshit-thô，koh mā 免講去日本做 backpacker- -a！ Kám 有影？？？

日本 kám 是咱 ē-thang 舉 ê 孤 1 ê 例？恐驚 á m̄ 是 oh！咱 lóng 知歐洲是真 tsē 人 ài 去旅遊 ê 所在，法國 kap 西班牙特別是全世界主要 ê 觀光地點，m̄-koh 有去–過 ê 人無可能 m̄ 知，法國 kap 西班牙 ê 車票、車頭根本足罕得有英文 ê 說明、號頭 kap 放送，koh 服務人員 mā 差不多 tshuē 無啥人 ē-hiáu 講英語 (有 ê 是 ē-hiáu 講 m̄-koh bē-giàn 講 lah！)，連大城市 ê 車頭 mā 是按呢！若照記者 kap 國內濟濟 半 thīn-thōng ê 講法，法國 kap 西班牙 ê 觀光業早就棺材入 tsi̍t 半- -a，tann mā 好 khioh 骨- -a！事實上 leh？？？

當然拙者 ê 意思 m̄ 是講增加英語 ê 號頭 kap 說明無好，beh 做雙語車票 kap 雙語號頭 tsham 介面，he lóng 是 kài 好 ê 代誌，m̄-koh，台灣人若 kah tann iáu 帶 hit 款「用英語就 thang kā 全世界走透透」ê hàu 呆想法，有影是 hōo 人看破 kha 手（kan-tann 去過美國 ê 款，tsit 種人若 koh 有去 toh 位 mā 無才調好好 á 觀察 lah），親像台灣 tsit 款「主流」ê 國際觀，有影卸世卸眾！！！

Ē 相信報紙 tsit 款講法 ê 人，根本就是 ka-tī m̄-bat 做過 backpacker！Beh 做 1 个離開一般觀光團 ê 路線、深入在地 ê backpacker ê 人，本來就無可能向望路 tsām ē 行 kah 真順 sī，koh-khah 無可能 lóng 無 beh 用著在地 ê 語言，以拙者做 backpacker ê 經驗，hit 款 tshuē 路問路 kap 在地語言 ê 學習使用，甚至是正面- -ê，bē-su leh 探險 leh，hit 種心適感，應該是做 backpacker ê 快樂之一 tsiah tio̍h，thài-thó ē lóng 變做負面 ê 印象 leh？

話講倒轉- -來，拙者無反對增加 ta̍k 項施設 ê 英文翻譯，m̄-koh 前提是：台灣人用英語 beh 通全世界 ê 眠夢是 m̄ 是好精神- -a？！另外，beh kā 台灣變做美國 ê 語言殖民地 tsìn 前，kám 免學習西班牙照「語言區」用「在地語言」做號頭、放送 kap 標示 ê 做法，人西班牙按呢做，並無失去外國觀光客，m̄-koh suah 保存 in 在地 ê 母語 kap 文化資源！咱台灣 leh？！除去英語、英語、英語直直 huah，咱是有啥物正港 ê 國際觀？咱連 ka-tī ê 根頭就放 leh hōo 爛- -a kám m̄ 是？怒！

總講 1 句，僥倖 lah！台灣人 ê 國際觀！哭！

特色圖片：Dean Lin/Flickr CC/goo.gl/Maj2V6