【台文話藝】Tsi̍t-kuá 討論 ê 記錄

日文內底，當然有足濟詞是「借」漢字來寫（漢字訓用），m̄-koh「和製漢語」kap「漢語借詞」tsāi-tsuí 是照「非訓讀 ê 漢字讀音」來讀- -ê，日本學研監修 ê《漢字源》內底有 suî-ê-á suî-ê 漢字 ê 呼音（包括：吳音、唐音、漢音）kap 字源 ê 紹介，照我淺薄 ê 理解，日文使用漢字，並 m̄ 是「單純 tik」用來訓讀 niā-tiāⁿ。

關係日本人使用漢字 ê 思考，幕末時代（19 世紀尾期）廢漢字 kap 漢字使用 ê 論爭，我想日本朋友應該比我 koh ke 足了解。是按怎日本無才調廢漢字？ 是按怎日本人 beh 直直造成 in gín-á ê 學習負擔？ 我想，tsit-ê 問題真複雜，m̄ 是就「效率」kap「理性」就 ē-tàng 解決- -ê。

「語言」kap「文字」tsiâⁿ 做人類社會–ni̍h ê 產物，無可能獨立 tī 社會 ê 影響之外，社會 ê 運作 kám lóng thàn「理性」或者是明學 (logic) leh 行？ 咱 thang 看咱所 tuà ê 社會 tō 看見見- -a。

系統（包括字詞來源）無 consistent，tse 是任何非封禁、kap 外界（其他語言）有接觸 ê 語言 lóng 有 ê 現象，我個人無 ka 看做是欠點。

是 m̄ 是 kan-taⁿ 文音 tsiah 是讀冊人引- -入-來 ê mi̍h，我 ê 想法是：台語內底除去 proto-language ê lexicon 以外，受漢文化影響所吸收 ê 語詞，基本上 lóng 是漢語借詞，台語內底，1 ê 漢字 ē 有幾 ā 種讀音，tsit-ê 情況應該 kap 日本 sio-siâng，日本漢字因為吸收漢字呼音 ê 時間無仝，所以 tiāⁿ-tiāⁿ kāng 字 koh 讀，有唐音、吳音 kap 漢音 ê 區別，台語 ê 讀冊音、白話音等等 ê 呼音區別，應該 mā 是 tsit-ê 因端所致。

咱按呢想：台語 ê proto-language 上早應該是 tī taⁿ 中國福建 ê 百越內底 ê 語言，是非漢- -ê，i ê 語詞，當然無可能是用漢字做基礎來起造- -ê，後- -來，漢文化強勢，侵門踏戶，開始大胚模 kā tsit-ê proto-language ê lexicon tiû 洗、替換，有大部份自底有 ê 字詞 suah ta̍uh-ta̍uh-á 去 hō͘ 漢語借詞 khàm- -過，現此時台語內底 ê 漢語成分有 juā kuân？ 有人講超過四分三、有人講 m̄-nā，有人講無 hiah 濟，總- -是漢語 ê 侵入，並 m̄ 是短時間內 ê 代誌，i 是經過真長 ê 時間慢慢 á 產生- -ê，也 tsit-ê 吸收／侵入 ê 過程，自然有無仝 ê 漢字呼音 ē 來 tiâu tī 台語內底，親像日文漢字有漢音、唐音、吳音 kap 和音（訓讀）ê 區別，台語對 kāng 1 ê 漢字，mā 有無仝 ê 讀音留- -落-來。

先說明 1 點，頭前講- -ê 語詞替換 ê 比例，並 m̄ 是 kap「北京語」比較，因為「北京語」並無比「台語」khah 濟歲，咱講- -ê，是闊義 ê 「漢語系」kap 屬 tī「百越」ê「proto-language」之間 ê 關係。

換話來講，讀冊音 kap 白話音，lóng ē-sái 講是「外來 ê mi̍h」，若是讀冊人 tī tsit 當中有產生路用，按呢，讀冊音 kap 白話音 ê tsing 差，應該是：讀冊音是 khah 後期 ê 讀冊人所引- -入-來 ê 漢字讀音，白話音- -leh，kāng 款 mā 是讀冊人引- -入-來-ê，只不過是 khah 早期 ê 讀冊人 niā-tiāⁿ。

咱若 beh 突顯台語 kap 華語（hām 其他漢語）ê 無仝，代先 ài 問：讀音無仝、詞源 sio-siâng，kám ē 影響語言 ê「獨立性」？ 英語講「anniversary」、法語講「anniversaire」，英語講「agreeable」、法語講「agréable」，明明詞源 sio-siâng，lóng 是 uì Latin 來- -ê，m̄-koh，英語、法語之間，kap in hām Latin 之間 ê 獨立地位 kám tio̍h 有受損蕩？

就學術論學術，台語 ê 詞語 kap 語法到底 iáu 有留 juā 濟非漢 ê 成分，咱必需 tio̍h 透過學術 ê 手段來證明，詞語 ê 部份自早就有 kuá 學者做- -過-a，咱 uan-nā ē-tàng koh 做，語法 ê 部份咱 mā ē-sái ka 做。

翻頭來講，m̄ 管學術 kap 客觀 ê 資料是 siáⁿ-mi̍h，咱 lóng 無應該失去咱對台語 ê「信心」，舉例來講：法語 tī 早前，不過是 vulgar Latin，是人看做無水準- -ê，uì Latin 墮落、退化 ê 1 種 Latin 方言，法語 ê 語詞 kap 語法，差不多 lóng 是 Latin 所變- -來-ê，m̄-koh，目今法國人 suah the̍h 法語 teh 展風神，臭屁講 he 是全世界上媠 ê 語言（語言 kám tsiaⁿ 實 ē-tàng 比媠？）

台語 tsit-má ê 地位，其實 m̄ 是 i ê 語言事實（語詞、語法來源）所造成- -ê，是台語人（包括你咱以外 ê 台灣人）本身無自覺意識、無母語意識、無獨立意識所致使- -ê，咱 ê 人民若 ē-tàng 精神，自然無要緊台語有受漢語 juā 濟影響（就親像法語 m̄ 驚 Latin（義大利 ê 1 種語言）做源頭、日語 m̄ 驚漢語 ê 字詞成分 sio-siâng），一來二去，tse 是「人」ê 問題，m̄ 是「語言」ê 問題。