【台文話藝】Beh 讀、beh 看、beh 閱讀？

老師 tú leh 解釋「閱」kap「悅」呼音 sio-siâng，koh「ua̍t」是偏漳腔，「ia̍t」是偏泉腔，i suah 雄雄 ua̍t 頭問我：「án-ne，看冊、讀冊 kap 閱讀意思有 siánn-mih 無 kâng- -無？」

我 ê 頭殼無 sûi 去整理 beh án-tsuánn ìn- -i，是先想著：「Eh…nah ē 問 tsit-lō 問題 leh？是 siánn-mih 因端 siánn-mih 起致，ē án-ne 問 leh？」

也因為 án-ne，我無法度好禮 á kā thiah-pe̍h hōo 聽，kan-tann kā 講：「應該是…無差 kài tsē ê 款…」

轉來 tī 厝，我 tsiah tsim-tsiok kā 想，ngh，是有意思 sio-siâng ê 所在 lah，m̄-koh 有時 tsūn 講 beh 去看冊，是 beh 去揀冊；koh 若 gín-á kā a 母講 i beh 去學校讀冊- -a，he 並無代表 i tī 學校 ē 直直 leh 閱讀（ua̍t-thok）。

若有人講 i leh「閱讀」- -leh，ngh…i leh tshòng- -siánn tik-si̍t 是 put-tsí-á 明- -a，增差 m̄ 知 i 是 leh án-tsuánn，講話 nah tio̍h tsiah-ni̍h-á 「臭酸 khùi 」，bōng-á m̄ 講 beh 講 thióng-á。

Kun-tu 我猶原想無 i 是 án-tsuánn ē 問、koh 是 án-tsuánn beh 問 tsit-lō 問題，m̄-koh 我真確定 1 件代誌：

你！有問題請直接問老師，mài 來問隔壁 ê thông-suê lah！！！ \___/”