【台文話藝】失語型反醒

Tsit幾冬若講著總體經濟，上tiānn聽- -著ê詞內底，有一个號做「失業型反醒」（『失業型復甦』），咱有話按呢講：「會好袂完全- -啦！」Ná有照原閣ná無按呢中中仔，予人毋知beh歡喜iah mài。

「第二屆全國高中職奇幻文學獎」首獎〈鹿與白晝〉tsit篇短篇小說，就hōo我tsit款感覺，tsit篇小說取幾若百冬前台灣歷史上ê平埔族跨部族王國「大肚王國」做題材，以「甘仔轄」大肚王做主角（作者另外用華語呼音翻做『坎瑪哈』），描寫平埔族kap侵門踏戶ê漢人hām荷蘭人對tu ê故事，tsiū故事內容來講，有影hōo人目睭peh金，幾若十年「除台灣化」ê歷史教育ē-kha，ē-tàng開始有高中生去發覺罕人致意ê歷史材料，寫做小說，咱ài kā呵咾，mā值得歡喜。

關係tsit个消息，請參考高中奇幻文學獎 穿梭《鹿與白晝》揭開平埔傳奇。

總- -是，新聞內底關係故事ê描寫，suah hōo我感覺bē輸是台灣歷史教育ê「失語型反醒」。

關係歷史記載，記者若無冤枉作者，按呢，作者有一項失覺察，伊寫講率領明鄭軍隊去打「甘仔轄」大肚王- -ê是鄭經，若照我所讀- -著-ê，tse毋著，是講，tse算做sió-khuá-á代誌，我khah煩惱- -ê，是新聞內底講作者為著beh表現族群ê無仝，koh用「散文詩hām文言文交tshap，來區別平埔族人hām漢人ê口白。」

咱無期待作者使用大肚王ê語言- -啦!咱攏知甘仔轄ê Papora語現此時已經流- -去，無啥可能tī故事內底kā照原，是講，作者認為hit時陣ê漢人，是講「文言文」？！恐怖！驚- -人！Tse實在是國民黨幾若十冬lám-lōo ê歷史tsham語文教育所致ê tânn漏。

文言文thài-thó有bat tsiânn做漢人ê口語？Hit个時代過洋行番、tī南中國海huah起huah倒ê漢人，毋管海賊iah生理人，差不多攏是Holo人！In講ê語言，tsāi-tsuí毋是啥物文言文，是泉州話、漳州話、潮州話！

若鄭成功- -leh，in爸系是泉州人，阿母是日本人，自然伊、伊ê家族仔kap伊ê軍兵，是講泉州話iah別款閩南語khah sîng，tī時ē變做文言文- -ah？

作者hōo夭壽國民黨kap tsa̍t頭學者騙- -去，lia̍h準講「文言文」是古早漢人通用ê口語，就親像tsit-má ê人誤會講全世界ê漢人ê通用口語tio̍h-ài是北京話kāng款，害！

台灣歷史ê啟蒙運動，已經tī學生囡仔ê身軀頂看ē著成果，毋過，tsit个反醒，ná親像無包括對母語、語言現況、語言歷史ê認捌，tse，包括咱攏知少年輩是失落母語ê一代，若斟酌kā想- -起-來，有影ē淡薄仔tsheh心。