【台文話藝】我所了解 ê 台灣文化

列位評審、在場 ê 兄姊 ta̍k-ê 好，我今仔日 beh 講 ê 題目是：我所了解 ê 台灣文化。

今年元宵射文虎，有一條燈猜文不止 á 心適，i 寫講：「Tann 真無文化，萬千年後 tsiah 是文化」，beh hōo ta̍k-ê ioh 1 位所在、1 款地場，m̄ 知 ta̍k-ê ē ioh 啥。

Beh 講我所了解 ê 台灣文化，m̄-tio̍h 代先來 pué-huē 「啥物號做文化」，我ē 記得自來一直有人鄙相經濟學家講：「對 1 个問題，10 个經濟學家會有 11个答案」，總..是經濟學家恐驚仔猶輸文化學者 thiám-thiám leh，咱知影1952 年有兩个人類學家收集研究學術界對文化 ê 定義，結果 suah 有超過 161 種無 siāng 款 ê 講法，tsit 款情況，實在是 hōo 人感覺「話若 beh 講透機，目屎是 pué bē 離」，最後咱 mā 只好取中心、核心 ê 意義，啥物是文化？咱借人類學者 Clyde Kluckhohn ê 話講：「文化是一陣有 sio-siāng- -ê、特殊生活方式 ê 人，in ê 一組價值觀、現實觀 kap 行為模式。」

咱 kā tsit-ê 定義 hē tī 台灣來看，台灣人是按怎生活..ê，按怎食、按怎睏、按怎行、穿插按怎、作穡按怎，按怎 kap 人 tsih-tsiap 往來，按怎看待約其略七八十冬 ê 人生，按怎看待病痛 kap 死亡，koh tī 歇睏 ê 時陣，按怎做藝量 kap 興趣，tse，就是台灣 ê 文化。

比論講食來講，台灣 ê 夜市仔，就表現台灣人特殊 ê 食 ê 文化，真濟外國人來台灣，攏去 hōo 台灣 ê 路邊擔仔 sannh..著，若 beh 講欠點，犯勢 kan-tann 平常時仔食著 khah 清、khah tsiánn ê 日本人，in 不時會 tī 食咱 ê 夜市仔了後歹腹肚，我 ê 日本朋友真趣味，前一工明明因為食了 siunn 油 siunn 鹹已經便所走 kui 暗，隔轉工 suah kāng 款 beh 招我 koh 去食夜市仔。

台灣人赴婚禮 mā 是世界有特色..ê，ē 記得有一擺 1个台灣人娶1 个日本小姐，tiàm 台北 1 間 kài 出名 kài 排址 ê 大飯店請客，tse 人客 m̄-nā ùi 台灣頭、台灣尾趕來，koh 濟濟新娘 ê 親 tsiânn 朋友 mā 專工坐飛行機 ùi 日本飛..來，會場內底，人坐 kah tshah-tshah-tshah，平平是烏頭毛、黃皮膚，m̄-koh 免聽腔口，一下看攏知 toh-tsi̍t 寡是日本人，toh-tsi̍t 寡是台灣人，tse 日本男士攏穿烏西裝穿著真pih-tsah、kat 白 ê ne-khú-tái，日本女士攏穿禮服、妝 kah 真蘇真 lè-táu，m̄-koh tse 高級 ê 會場內底，濟濟台灣人suah kha 踏「六兩」ê sū-lí-pah，身軀穿 polo 衫，有 ê 人連 T-shirt kap 淺拖仔都穿..來，列位想看 māi，tsit 款台灣 ê 婚禮文化，到底是靠俗人實在，或者是凊彩無大才？

今仔日 kah 若是來演講，koh 來，就講 1 項台灣 ê 演講文化，m̄ 知咱 kám 有參加過台灣囡仔 ê 演講比賽，若有，一定對 tsit-ê 情形印象真深：「he 圓 lìn-lìn ê 西瓜一粒 tsiah-ni̍h-á 大粒，我 gia̍h 刀對中央 kā 剖 pîng，一半hōo a-pa，一半 hōo ma-ma。」比手畫刀，牽絲吊 kuân 音 ê 演講文化，毋知是世界 toh 一位偉大演說家 ê 發明？

台灣 ê 俗民文化當然 mā 有 i hōo 人感心 ê 所在，一般來講，台灣人 kap 人 tsih-tsiap，攏是真古意 koh 熱情..ê，咱 ka-tī tuà tī 台灣 kiám-tshái 無感覺，m̄-koh 咱若知有真濟 a-tok-á 因為台灣 ê 人情味，自按呢決定 beh 蹛佇台灣，按呢，咱應該會當淡薄仔體會台灣人 kap 人來往交陪 ê 文化。

話講 kah tsia，無的確有人會想 beh 問講：你講講規大 thuann，攏是 hiânn 火煮飯、行路坐車、ûn-ke 來去 ê 四常代誌，台灣文化，kám 無層次 khah kuân ê 部份。

當然有..a，任何 1个進入到以中產階級做主體 ê 現代社會，自然攏會產生所謂 ê high culture、幼路 ê 文化，比論：繪畫、雕刻、音樂、戲劇、表演藝術等等，總..是 beh 講 tsit 項，咱就 m̄-thang 見古，想講愈老愈舊 ê 物件 tsiah 是愈幼路愈有價值 ê 文化。

文化人類學之父 Edward B.Tylor bat 講：hōo 人提來鼓吹「文化復興」ê ke-si，真有可能是歷史演進 ê 過程中，一寡失去路用、kap 現實生活失去連繫，bē-tàng koh 有互動 iah 是對話 ê 項 mi̍h kap 觀念，tsit 款物件 m̄ 是文化，是叫做 cultural residual -「文化 ê 碗殘（tsân）」，講 khah 白..leh，就是死人骨頭、化石 hit 類 ê 物件 lah。

文化是活..ê，是直直 teh 變化..ê，是 bē 用得 ùi 土地 kap 人民 thiu-thuat..ê，tsi̍t-kuá 歷史 khah 久長 ê 國家，tī in 猶無以中產階級為主 ê 公民社會tsìn 前，有一寡專門服務皇帝 kap 貴族 ê 藝術 kap 文學，tsit 款 kap 咱百姓人無 tī-tāi，koh 食百姓人 ê 血、suh 百姓人骨 tshué ê 文化碗殘，無應該變做文化唯一 ê 定義，koh-khah 無應該提來做 phín-phóng ê 理由。

咱攏知影美國 ê 歷史 tsiah 200 外冬，m̄-koh 美國人 suah 有才調建立 in ka-tī 文化 ê 信心，甚至變做對全世界出口文化 ê 文化帝國主義，無 koh khû tī 歐洲 ê ē-kha 做老二..ê，咱比論來講，五○年代 ê Pop Art (華語講普普藝術) 就是 1 ê 上清楚 ê 例，台灣藝術家謝里法 bat 講：美國 ê Pop Art 通講是人類二十世紀上有個性 ê 美學，往過 hông 看 bē tsiūnn 目 ê Coca Cola、樹奶糖、西部 cow boys、罐頭、尪仔圖 kap 對 Marilyn Monroe ê 性崇拜，攏tsiânn 做美國藝術家創作 ê 材料，變做美術館展覽 ê 內容，雖然歐洲有幾 ā 千年前希臘、羅馬 ê 雕刻 kap 繪畫，m̄-koh 有一點是在水 khah 輸Pop Art..ê，Pop Art 事事項項攏屬 tī 美國人 in ka-tī，kap 美國人是有直接 koh 上深 ê 感情連繫..ê，tse 對美國人來講就是媠..ê，咱通講這就是美國文化，若 tse 整個產生 ê 過程，就是藝術 ê 源起頭。

咱台灣佇幾十冬前就 bat 出過 tio̍h 著國際大獎 ê 畫家：陳澄波、雕刻家兼畫家ê 黃清埕，有人 kiám-tshái 知影，音樂家蕭泰然長久以來真拚勢 leh 創作古典音樂作品，若表演藝術方面，蔡瑞月幾 ā 十冬前，就 tsiânn 做東亞除去日本以外現代舞 ê 先行者..a、tann lán koh 有雲門舞集 tsit-ê 世界一流 ê 舞團 leh；傳統藝術方面，河洛歌仔劇團、陳美雲歌仔戲團、明華園 ê 歌仔戲，小西園、新興閣、五洲園 ê 布袋戲，新劇 ê 部份，tiānn-tiānn用母語演出 ê 金枝演社、台南人劇團，攏是台灣有名聲，外國有出名 ê 藝術文化團體，真濟人問講：台灣 kám 有畫家、kám 有音樂家、kám 有藝術家，會按呢問 ê 人，咱 kám m̄ 免請 in khah tsiap 買票去文化中心、戲劇院、音樂廳、美術館、展覽館去聽去看去參觀？

咱拄 tsiah 有講著 khah 無三百冬 ê 美國文化，伊 ê 影響已經湠到全世界，m̄-koh 咱 kiám-tshái 無注意著，咱台灣 ê 大眾文化，mā 有一項是通世界徛頭名..ê？咱台灣雖罔 3 萬 6 千平方公里，細細 ê-á，兩千兩百萬人，佔全世界 khah 無百分一，m̄-koh 華語 kap Hō-ló 話 ê 流行歌曲，suah 是台灣 ê 歌手 kap 唱片公司 ê 天下，tī 中國、東南亞獨佔贏面，咱若進一步去了解，koh 會發覺，閃靈樂團 kap 拷秋勤，tī 歐洲 kap 美國是 juā-ni̍h-á 轟動武林、驚動萬教，有足濟足濟 ê 歌迷，結果顛倒是咱台灣人 ka-tī 無啥熟似 tsiah-ê 少年音樂人。

差不多兩冬前，我參加一个會議，主持會議 ê 人無張無持煞 leh 為著現此時 ê 少年輩吐大氣，i 講：「往過攏感覺 hit 款低路 ê 文化應該 ē 慢慢 á 消失，親像 lán 頂輩因為無受 siánn-mih 教育，所以食檳榔–la，講話 khah 無文化，iáu koh ē-tàng 理解，毋擱 tsit-má ká-ná 20 thóng 歲 ê 少年家，mā teh o̍h hit 號款式，而且 koh bē 輸真風神 hit 種感覺。」

伊 suà..lueh koh 講：「禮拜時 á，我坐計程車 mā 是去拄著 1 个 ùn-tsiàng，規路 leh kā 我講 toh 位 ê 檳榔西施 juā 媠拄 juā 媠，koh nā beh tsiūnn 高速路，tio̍h 安怎駛拄安怎駛，tsiah ē 經過 toh 位拄 toh 位，juā 好看拄 juā 好看，hit-ê ùn-tsiàng oan-nā 無幾歲人 leh，人少年少年，nah ē 安呢？！」

Tsiah-ê 話 kám m̄ 是聽 tio̍h 熟似 á 熟似？Nā 無斟酌 kā 想，koh 親像有理有路，其實頂真 kā 分拆- -起來，有影是也好笑，也好啼。

咱若對「文化」ê 定義無清楚，koh 對文化事物後壁 ê 歷史、深層意義無理解，是 beh 按怎會當有資格來做文化批評 leh？

食檳榔 tsit 件代誌來講，食檳榔烏白 phùi 當然真 bái，m̄-koh 用食檳榔來判斷 1 ê 人 ê 字目 kap 人才，tse kám tio̍h？Tī 南島 ê 傳統內底，檳榔是慷交 kap 祭祀 ê 禮物，食檳榔健康..無是一件代誌，m̄-koh 咱 ê 祖公祖媽是按怎看待檳榔..ê，咱 kám 有了解，用淺薄 ê 眼光就 beh 判斷文化 ê 價值，tsit 款講法 m̄-tsiah 是欠缺文化 ê 深度。

Beh 了解台灣 ê 文化，除去 ùi 日常生活來看，mā 需要行入去無仝族群、行入去歷史時代來揣， Bunun (布農) ê 八部和聲 pasibutbut 是國內外音樂研究中間 kài 出名 ê 樂曲，Cou (鄒) ê Homeyaya 親像天頂傳..落.來 ê 歌聲，Hō-ló 人音聲和諧、話句詼諧 ê 褒歌、Ha̍k-kâ 話句對 thīn、像 bā-hioh khûn 山浮kuân tshih 低 ê sān-kô、許王配合南管 ê 布袋戲、國寶藝人廖瓊枝演出 ê 歌仔戲四大齣、楊秀卿 ê 唸歌、鄭溪泮 ê 長篇台語小說《出死線》、賴和為受壓制 ê 百姓出聲 ê 文學作品，台灣 ê 文化，是有族群闊度、有時間深度 ê 花錦布，真值得咱 ûn-ûn-á kā 看 hōo 斟酌。

上尾..a，m̄ 知 ta̍k-ê kám 猶會記得一開始我講 ê 燈猜..無：「Tann 真無文化，萬千年後 tsiah 是文化」，tsit 款所在，m̄ 是別位，就 tī 墓仔埔 ê 墓仔內，第一句講 hia tann 無文化，是因為根據文化學家 ê 說明，咱明明知影，有人 teh 生活 ê 所在就有文化，只有死人 tsiah 會無文化；後一句講：萬千年後 tsiah 是文化，tsit 句是 beh 用來 khau 洗 hiah-ê 講台灣無文化 ê 人..ê，因為 in lia̍h 準文化攏著古老溯古、死人骨頭 tsiah 算是文化，希望咱 m̄-thang 去 hōo 騙去，食人 ê tshìn 菜碗殘，咱著珍惜咱身軀邊屬佇咱 ka-tī ê 文化，mā 做夥來設想 beh 按怎 hōo 咱生活了 koh-khah 有品質，按呢台灣文化自然會直直進步、直直提升！

我今仔日 ê 演講就講到 tsia，多謝 ta̍k-ê，多謝！