【台文話藝】成功

Tse對hia-ê有捌斟酌將家己人生想- -過ê人來講，算是舊漚舊臭ê問題- -ah：「啥物號做”成功”？」Mài講一般人，連基督教會內底ê神學論辯to有摻tshap- -著，簡單講，毋管是啥mih箍仔，關係人生「成功」iah是「無成功」，攏會當做一刀破兩爿，一爿是「世俗tik主流價值觀定義ê成功」，啊另外一爿毋是；社會一般ê講法咱攏真知- -ah，就無ke講，翻頭sa教會界做例，有一个khí-uá（keyword）號做「成功神學」，論予較束結（sok-kiat）就是「上帝ê祝福kám有包括 “世俗tik ê好物（hó-mih）”？」

比論：「好額、康健、權力地位、名聲」，或者是講，上帝看代誌hām世俗人無sio-siâng，所致伊毋是提世俗人ê標準咧賞賜伊疼ê人，是kōo像「永遠ê活命、心內ê平安、堅強ê信心」咧予- -人；講- -起-來，是淡薄仔花花啦，因為就ná-tshan像前捌會- -ê，tse聖經數千條，欲用家己tshiâu，tsit兩爿都也隨人有才調引經文論kah四正四正咧。

啊是按怎koh欲論對教會- -去？實在是因為J頂禮拜揣我叫苦ê時，欲尾仔有問著一句kioh：「恁大學同窗攏比你較成功honnh？」雖然無kā thuh臭，毋過一个信上帝信kah真熱心ê人ē問按呢，有影予我不止仔意外。

講kah tsia，相信逐家也知我徛佗一爿- -ah。

簡單講：設使予我「大富（pù）好額、身體康健、有權力地位、名聲透京城」，毋過煞無法度做家己有趣味ê代誌，佇工課、感情等等，特別是上親ê關係內底，著ke-ke減減家己騙家己、搬戲予人看，啊無閒tshih-tshih也好、siān-siān the後殿也好，等歲數到kah一个坎站、亦是咧欲死ê時，tsiah想起著講「若有法度重頭閣活- -一-擺，我想欲有無仝款ê選擇，無仝款ê人生。」按呢，對我來講，he毋是「成功」，he是「失敗」kah tah底！

收入、地位、名聲，he究真是有偌重要咧？講較歹聽咧，六七冬前，我ê月給就比ke我十歲ê J tsit-má ê月給較懸- -ah，閣liâm-mi欲升做一个細个部門ê主管，頂司kah意- -我是kah意kah欲害，我若肯踮，溜籠坐- -咧tshìng- -起-lih，金錢、地位、名聲，是桌頂拈柑niā-niā，問題是我hit當陣無快樂，我無愛因為頭路違背良心，嘛無愛為著薪水拍歹生活品質，hit時仔，都已經予一寡私人ê項物煩kah強強欲tshia跋píng- -ah，啊人生hit另外一半ê係項咧，算是我猶會當掌握- -ê，我kan-tann想欲夯硬篙、照家己ê意思去過，甘願收入、權力、地位、名聲攏放。

食一般頭路欲tsiâⁿ十冬，錢大條- -ê無儉- -著，目今物質生活真素樸，毋過我顛倒感覺過著真四序、人生真「成功」…..因為若tsit-má愛我死，抾起對我愛- -ê佮愛- -我ê人較歹勢，我有影攏無遺憾，uì心- -裡感覺人生就是愛親像tsit一樣，我真滿足佇- -咧。

「成功」，佇隨人ê定義檢采差大碼，若敢sa- -咧就凊彩hut，我ē真煩惱tsit个人，kám有斟酌將「家己ê人生」想予透？有蹛tsit个主題想予到角ê人，m̄-nā較袂無彩活，不管伊對家己ê人生ê選擇是啥物，是佮大部分人仝款也好，抑是人看伊做各樣也罷，基本上，伊看人看世事ê角度ē ke真妥當…

若有機會，應該愛kā J點注- -一-下…