【台文話藝】Hit款台語文學

老實講，我幾若擺拍拚kā進前ê印象hênn- -leh，kā in ê作品koh提來讀，毋過，幾若冬- -ah，見若讀兩位T.T.P ê作品，攏會讀kah khí-moo bái…是按怎？真簡單，讀in寫ê物件，有機會讀著「文學」，毋過煞無法度走閃hin內底走tsua̍h ê台語，內底語法佮語詞ê錯誤是窒倒篇！

毋過文學箍仔就是按呢生，in也出冊，也通過審查得著創作補助，佇某一个程度來講，有資源（包括人額hām資金）講話自然大聲，tsit个模式就是互相褒so，我呵咾你ê作品，你呵咾我ê作品，我寫評論褒- -你，你著（tù）分析褒- -我，win-win game，隨人有利益，逐个攏歡喜，實情按怎，tshap-tshap伊去死！

台語文學已經是小眾內底ê小眾- -ah，照理無應該koh牛牢內tak牛母，總- -是，我講tsia-ê，是對「in戴一頂作家ê帽仔ê基本責任」來講- -ê，若家己掠家己是一个法語作家，煞佇作品內底出現蓋濟法語ê語法錯誤，koh對法語詞無夠熟手，顛倒直直teh套德語詞，tsit款作家，kám毋免自我反省或者是感覺見笑？拄起手ê寫作者按呢，咱猶真會當kā理解兼諒解，總- -是，寫幾若冬了後，都也家己謗（pòng）講家己是台文作家／台語詩人- -ah，煞原性不改，干焦靠勢有一陣同人咧互相扶挺（phôo-thánn），按呢，in作家ê銜頭、hām in聲聲句句咧喊喝ê正義公理，煞攏袂親像是咧kā in gio̍h笑tsham gê洗- -sìm？

毋管是「啥物語」ê文學，頭一个條件，定著是「語言」本身愛端的（tuann-tiah）（親像Joyce等人hit款為著文學目的來扭曲語言ê情形咱佇tsia無欲討論），我來批評，毋是講我已經做kah真好，毋過，我家己咧寫作，總扯（tsóng-tshé）一工上無查辭典查欲幾若十擺，寫好ê物件，嘛定定hông讀，予老台語人kā我牽教講佗位語詞用了無對同、佗位語法愛修改，按呢一工一工沓沓仔粒積，一改koh一改uì錯誤內底學習，予家己咧寫台文ê時，就是台文思考、台語語法，一直kah昨暗，我都猶提作品去予人讀，接受人佇用詞佮語法kā我批評指教- -leh！欲按呢做是啥因端？就是因為「語言」是「ｏ語文學」ê根底，若家己講kioh家己是「詩人」是「作家」，煞連語言操作都無致心，按呢面皮kám袂siunn過頭厚？

對家己台語程度無信心ê人mài誤會，我ê意思毋是愛恁攏mài寫。Kah現此時，我家己嘛猶會用毋著詞、抑是佇語法失覺察- -leh，所以，我佇tsia毋是欲愛台文寫作者見寫作就愛百分百正確，嘛毋是叫逐个攏袂使寫毋著，我咧強調- -ê，是寫作者對語言操作ê基本要求，親像兩位T.T.P按呢，有詩人／作家ê銜頭，作品內底煞看袂出in踮語言使用頂懸ê責任感，我欲講：tse是台語文學ê大不幸！

作家- -ah！詩人- -ah！請mài koh予阮hit號台語文學：無台語ê台語文學，台語破相ê台語文學！