【世界台】泰國軍方毋放手 恢復民主攏是假

泰國ê軍方自三年前發動政變上台，講會恢復民主選舉，卻直直延期，這個月koh公佈「20年計畫」，規定未來ê政府著愛遵守。軍方無欲放手，底時會有民主，iáu-koh無一个影。

軍方擬定的憲法草案，確保in未來繼續干政的權力，草案舊年8月已經佇無言論自由的ê情勢中，公投通過。毋過老國王10月過身，新國王對一寡限制皇室權力ê條文有意見，命令修改，tsit-má猶未定案。選舉ê時間，看來上緊著等kah明年下半年。

若準選舉，mā無代表就民主矣。照軍方ê憲法，參議院ê議員完全指派產生，而且權力擴大；政府koh有設幾若个特別機關，由軍方控制，民選政府若是欲行家己ê路，予軍方無佮意，遮的機關會當共in阻止。

自這世紀以來，泰國政治ê基本局面就是傳統菁英，包括皇室、軍方和官僚，佮前總理Thaksin Shinawatra tshuā頭ê新興勢力之間ê鬥爭。Thaksin ê黨派受著首都Bangkok以外ê中下階層支持，佇全國大選毋捌輸，但是伊佮in小妹ê政府前後佇2006年佮2014年攏予軍方政變偃倒。

Thaksin流亡海外已經十年外。但是kah-tann，共伊ê勢力清理掉，猶是軍政府重要ê政治目標。

2月至3月，政府共泰國上大、上有夠力ê佛寺封鎖23工，欲掠72歲ê住持，結局猶是予伊走去。伊被指控歪哥，但是政治學者Pavin Chachavalpongpun講，實際原因可能是軍方認定這位法師佮Thaksin有關連，而且這个宗派予傳統勢力感受著威脅。

被軍政府註銷護照，流亡日本ê Pavin講，「泰國絕對是當咧行向威權主義，各方面攏是。」

《經濟學人》週刊評論講，問題出佇軍方共家己看做是泰國政治ê裁判，叫是in發動一場koh一場ê政變是咧守護這个王國，煞毋知這才是政治不安ê上大原因。