【世界台】反網頂仇恨言論 德國新法起行就撞突

德國今年開始實施新法律來壓制社交媒體頂面ê「仇恨言論」。一下實施隨發生幾若件爭議案件，予人抗議妨害言論自由。表面看只是法律定了有妥當無ê問題，實際上牽涉著德國特殊ê烏暗歷史佮人口新挑戰，特別歹舞。

2017年ê尾工，Cologne ê警方佇Twitter用四種語言發訊息，祝逐家新年快樂。阿拉伯文版煞去惹著極右派，德國另類選擇黨（AfD）ê國會議員Beatrix von Storch (文章頂面相片內底的演講者) 佇家己ê Twitter起撟，講這是欲「巴結野蠻ê Muslim強姦犯。」伊這鋪*佇隔轉工，正月初一，予Twitter封掉，甚至規个口座都消失半工。仝黨另外一位頭人佇Twitter共相伨，罵著移民ê鋪mā隨無去。

新法規定，大型網路平台若是接著檢舉，原則上著愛佇24點鐘以內，共仇恨言論、Nazi標誌等等「明顯違法」ê內容刣掉，若無，可能受著上懸到5000萬歐元ê罰款。

佇紲落來ê風波當中，甚至一寡剾洗圖文嘛予人刣掉，無論是徛佗一爿；極右派共家己宣傳做言論自由ê烈士；主導這項立法ê法務部長Heiko Maas予人罵kah臭頭；伊家己進前bat罵一位反移民ê作者是「白癡」，這條鋪煞嘛去予Twitter刪掉。標準是啥，眾人掠無頭摠。

真濟人批判這个法律共判斷啥物是違法ê責任交予網路公司，後者驚受罰，煞共認定違法ê範圍放kah足闊。另類選擇黨、自由民主黨佮綠黨攏主張修法。毋過Mā有人講，新法予人牽拖kah過頭矣，像Storch口座予人停用這款代誌，就佮新法無關係，是Twitter照伊本身ê規定做ê，Twitter佮面冊tsia-ê大型社交媒體，對爭議言論ê處理模式，受著美國政治ê影響較大， 德國法律毋是重點。

言論自由佮反歧視之間ê緊張關係，佇民主國家真四常，毋過德國因為有Nazi佮東德極權ê恐怖經驗，問題特別敏感。2015年以來，收容120萬主要來自中東ê移民，予衝突koh-khah激烈佮浮出。毋但有在來族群對新移民觀感ê問題，Muslim移民mā不時有反猶太ê言行。執政黨已經準備欲修改法令，予會當共反猶ê新移民趕出去。

《經濟學人》雜誌指出，進前ê德國社會，較穩定、同質、守規矩，管理言論較簡單。2015年以來ê移民潮，使本來相對慢ê向多元演變過程雄雄加速，網路頂充滿主流媒體袂講ê言論，這个新ê德國，已經變kah較歹治理。

．鋪(phoo)：創新詞，英文的post，華語口語常說的po，即網路上的貼文、帖子。