【世界台】拍Islam國有功 Kurd族猶原難建國

Turkey對倚邊界ê Syria城市Afrin進行炮擊佮空襲，in講控制遮ê Kurd族政黨（PYD）佮軍隊（YPG），和Turkey境內ê Kurd族分離主義者（PKK）攏是仝陣ê恐怖份子。其實自2015年，Turkey軍機飛入Syria轟炸所謂「恐怖份子」，伊ê主要目標就是Kurd族，毋是美國招伊來鬥拍ê Islam國 。

Syria佮Iraq境內ê Kurd族，佇對Islam國ê戰爭內底表現上勇，有美國來相伨。In mā希望趁這場戰爭ê機會，發展家己ê勢力，得著西方ê支持，來獨立建國。毋過Kurd族人口主要分佈ê國家當然攏反對，美國mā毋捌承諾。

Tsit-má，Islam國已經荏去，佇複雜ê國際情勢當中，Kurd族對Trump政府ê意義變kah不明。這遍Turkey發動攻擊了後，美國ê反應無明確、無一致。國防部希望和Kurd族繼續發展軍事合作，白宮煞較保留，避免得失Turkey。畢竟Turkey是地區重要ê強權，並且是美國ê北大西洋公約組織（NATO）盟國。

【世界台】拍Islam國有功 Kurd族猶原難建國 - 180129

舊年9月，Iraq ê Kurd族自治政府舉辦獨立公投，結果超過九成贊成，毋過這个行動自頭就無得著國際支持，掌權ê集團koh內鬥佮腐化嚴重。一个派系反背，共重要ê油田放予Iraq政府提去，自治政府失去要緊ê財源。
 
對Turkey來講，沿伊佮Syria邊界規逝ê Kurd族地區，攏是威脅，伊宣稱欲共恐怖份子總趕出去。毋過這搭猶koh有美國駐軍，Turkey ê用兵會到啥物程度，目前不明。

另外一方面，Syria ê政府佮叛軍頂禮拜佇Vienna參與聯合國主撨ê和平談判，mā無進展。Syria政府有露西亞鬥跤手，那談那拍，佇戰場愈拍愈贏，佇談判桌頂ê立場就愈來愈硬。Bashar al-Assad總統欲收復所有ê國土，而且無愛落台。這禮拜，露西亞koh欲辦一場和談，毋過叛軍已經講無欲參加。

有分析講，佇種種ê壓力之下，Syria ê Kurd族未來較有可能ê路，是佇Syria內底自治。