【世界台】歕觱仔佇民主社會ê價值佮危險

這站《郵報：密戰》這齣電影tng-teh做，劇情是媒體提著歕觱仔者(whistleblower)提供ê資料，共政府掩崁ê真相搤出來，真刺激mā真感動人。其實搤密ê倫理無簡單，政治理論家Michael Walzer拄好發表一篇文章討論，共維護民主制度看做上要緊。

這篇文章刊佇最新一期《外交事務》期刊，Walzer講，歕pi-á者根據家己ê良心抑是責任感，共伊認為無道德抑是無合法ê官方行為，來通報頂司或者是對外公開，毋過伊這个行動是毋是符合道德，kan-na會當佇事後，由公民大眾來評判。

【世界台】歕觱仔佇民主社會ê價值佮危險 - 180306

佇政治界，講白賊真四常，是毋是所有ê白賊話攏值得共掠包？Walzer認為無一定。比論講，一个政客收無清氣ê錢，koh佇競選大會講白賊，毋過伊án-ne做，是為著拍敗一个特別惡ê對手，一个威脅欲共民主政府偃予倒ê新Nazi份子。這時，前者ê競選團隊內底，有人共伊ê歹代誌煏空，你敢會支持這个歕pi-á行為？

Walzer講伊袂支持。因為當民主制度已經佇危險中ê這个時陣，大多數ê公民應該會例外接受這个政客，雖然伊無遵守民主規範，但是in相信伊至少會保護民主制度。

Walzer ê論述是uì美國佮美國人ê觀點。美國不時有海外ê祕密軍事行動，照講，佇國外使用武力，是愛經過民主辯論ê議題。既然án-ne，是毋是共這款行動搤出來，就是正當？Walzer認為，愛看彼个軍事行動本身目的ê正當性，比論敢是為著國家安全抑是人道所必要，mā愛考慮若是共代誌公開，是毋是會危害著美國相關任務人員ê安全。

Walzer ê論述是uì美國佮美國人ê觀點。美國不時有海外ê祕密軍事行動，照講，佇國外使用武力，是愛經過民主辯論ê議題。既然án-ne，是毋是共這款行動搤出來，就是正當？Walzer認為，愛看彼个軍事行動本身目的ê正當性，比論敢是為著國家安全抑是人道所必要，mā愛考慮若是共代誌公開，是毋是會危害著美國相關任務人員ê安全。

若是一項政府行為明顯違法抑是完全無天良，比論屠殺平民，這時，歕pi-á一定正當。問題是政府行為ê是非定定無hiah-nī清楚，這時，拍算欲歕pi-á ê人，就是teh進行一種「道德ê冒險」。伊ê資訊真有限，處境真孤立，面對真大ê無確定性。萬一伊ê決定是根據固定ê意識形態，抑是長期ê偏見，就誠害。

Walzer講，民主社會ê公民愛知影懷疑政府，mā愛會曉懷疑歕pi-á者。後者愛判斷ê，是伊ê搤密敢會得著公民普遍ê認同。伊無的確mā會付出受著司法處罰ê代價。有ê歕pi-á行為受著法律保護，有ê無，保密法律猶是有必要，只是法院ê判決應該綜合考慮，符合比例。

Walzer認為，大眾有義務經過思考、辯論，來回應歕pi-á者，毋是跤頭趺反射式ê敵意抑是支持。

佇結論，伊講，歕pi-á者佇民主ê政治世界內底有伊ê角色，毋過這是一个非正式ê角色，大眾愛認識伊可能ê價值，佮可能ê危險。