【世界台】假新聞 舞kah核戰都歹講

耶誕節前一工，Pakistan ê國防部長佇Twitter發文唱聲 (倒手頂面的圖)，暗示會用核子彈去掔以色列。原來伊是去予一條假新聞騙去，掠做以色列代先威脅。世界譀ê情節，佇假新聞成做代表現象ê一年落尾，拄好提醒這个問題有偌嚴重。

代誌ê起頭是一个號做AWD News ê網站佇20號「報導」講，以色列ê國防部長警告，若是Pakistan派軍隊進入Syria，以色列會用核子彈共Pakistan毀滅掉。這條文章koh共以色列前任國防部長Moshe Ya'alon寫做是現任ê。

雖然是遐爾好查證ê代誌，Pakistan ê Khawaja Muhammad Asif部長煞擋袂牢，發文唱講「以色列袂記得Pakistan mā是一个核子國家」。後來以色列ê國防部佇Twitter面頂澄清，講彼條報導根本無影。

2016是假新聞滿四界ê一年，佇美國總統大選期間尤其厲害。「後真相（post-truth）」抑是「後事實（post-fact）」予一寡媒體佮機構選做今年上tshìng ê詞。意思是這个時代，大眾毋管啥物才是真ê，訊息只要符合in ê感覺佮信念，就會予in接受，佇網路頂傳來傳去，效應愈絞愈大。

這个現象予人煩惱，毋過英國評論家Timothy Garton Ash講，無理由絕望。首先是網路智識普及，會予事實ê查證愈快，一个假ê消息，隨就會予人掠包。

伊講，學校攏應該開網路識讀ê課程；公共媒體佮公益單位贊助ê調查報導會當有正面作用；媒體ê品牌信用比過去更加重要；科技公司會當鬥追查佮篩掉假ê消息。

Facebook佇12月中宣佈欲實施新做法來對付假消息，包括若是真濟人檢舉一條貼文是假消息，Facebook會共伊轉予第三方ê查證單位，若是後者認定是假消息，這條貼文就會hőng*標示「有爭議」，並且較僫出現。

已經有一寡媒體推出「佗一條是假新聞？」ê測驗，佇後事實ê時代，凡勢mā會成做常態。

*hőng：「予人」的連音，被。