【世界台】Trump政府ê露西亞政策跤步亂

美國對露西亞（Russia）ê政策tsit-má亂操操，國家安全顧問Michael Flynn落台ê事件，牽涉著 Donald Trump總統佮伊ê人馬，凡勢koh有和露西亞ê秘密來往，猶未煏空。加上外交、國防首長佮總統無仝調，連本底真佮意Trump ê露西亞，看起來mā開始緊張矣。

佇Trump當選後、就任前，內定做國家安全顧問ê Flynn佮露國駐美國大使講電話，討論著Obama政府對露國ê制裁。私人進行國家ê外交，是違法ê。代誌正月中開始uì情報機關漏洩出來予媒體。Flynn 頭先koh否認，後來漸漸崁袂牢，伊佇2月13辭職。

Flynn ê代誌猶未煞。到底Trump ê競選抑是執政團隊，佮露西亞koh有偌深ê牽連、總統本人知影無？情報單位猶咧查。另外一方面，Trump譴責漏洩情報是犯罪行為。總統和情報界繼續鬥法。

Trump對露西亞友善，批判盟邦，自競選期間就予政策界誠煩惱。伊捌講北大西洋公約組織（NATO）已經「過時」。毋過頂禮拜，國務卿Rex Tillerson佮國防部長James Mattis分別佇歐洲講出予歐洲盟邦較放心ê話。

Tillerson講，美國若欲和露西亞合作，kan-na佇符合美國佮盟邦ê利益ê時，才有可能，包括露西亞愛遵守Ukraine ê和平協議。Mattis講美國全力支持北約，並且目前無欲和露西亞進行軍事上ê合作。這兩位，tsit-má予外界看做Trump政府內底較清醒ê重要官員。

根據報導，以上ê種種事件，雖然露西亞政府無正式做特別ê評論，但是至少佇媒體佮民間，若像對Trump政府ê熱情期待烏有去，誠不滿。一份官方報紙講，白宮最近關於外交政策，包括對露西亞政策ê講法，互相矛盾。

Koh-khah基本ê問題是：準做無最近遮的發展，Trump想欲佮露西亞合作ê按算，也無可靠。《經濟學人》週刊分析，雙方ê利益差傷遠矣，比論佇Syria，Trump講欲消滅Islam國，露西亞總統Vladimir Putin喙裡講相siāng ê目標，實際上是欲透過支持Syria總統Bashar al-Assad，永遠佇中東駐軍。

文章講，美國聯合露西亞，來對付中國，mā是無實際ê想法。露西亞比中國弱太濟，商業利益佮政治價值koh佮後者相倚，Putin袂想欲去得失北京。