【世界台】加密貨幣大起大落 各國加強管制

以Bitcoin為代表ê各種加密貨幣，過去幾個月行情大起大落，tsit-má愈來愈tsē國家驚影響金融，欲來加強管制，甚至禁止交易。原本講是虛擬ê物件，進入真實世界那深，mā免不了真實權力來插手。

舊年初，一个Bitcoin值1000箍美金左右，了後直直tshìng懸，到12月中已經欲倚2萬箍美金，隨koh雄雄跋落來，2月初bat落kah 6000捅，這幾工peh轉kah 8000外。

Bitcoin等等加密貨幣，愛透過「挖礦」來生產，彼是用性能真強ê電腦來運算解題。一切ê交易，是佇叫做「箍鍊」（blockchain）ê分享資料庫頂頭進行，彼是分散ê系統，無中央ê管理者，交易ê記錄無法度翻頭修改。支持者宣稱這比中央銀行控制ê貨幣系統koh較可靠。

雖然有一寡商品佮服務真正會當用密幣買，毋過實際上密幣主要已經是投機ê工具。有真tsē經濟學者佮金融業者警告講泡會破去。

另外，不時有交易所予「械客」入侵，共密幣偷搬去，害投資人損失傷重ê事件。最近ê一个例，是日本ê Coincheck交易所正月底予人偷提值5億外美金，叫做 NEM ê密幣。日本是政策上較接受密幣ê國家，mā佇事件後對相關業者普遍進行檢查，警告無登記ê交易所。

中國已經開始禁止密幣ê交易所佮頭擺發行，並且打壓挖礦這種真食電ê活動；韓國準備欲立法禁止密幣交易；美國ê證管會取締頭擺發行共個人投資者募資，國稅局mā認定賣密幣ê所得愛徵資本利得稅。

法國佮德國ê財政部長佮中央銀行首長頂禮拜五發聲明，呼籲3月佇Argentina開ê 20國集團高峰會愛討論密幣ê問題。這凡勢會成做國際協同對密幣採取行動ê一步。