【世界台】美國銃管制咧諍啥？ 真少通參詳

美國三不五時就發生開銃亂射事件，銃管制ê爭論就又koh熱起來，毋過因為國情特殊，有通參詳ê範圍其實足細，比論銃子篋仔上tsē會當入幾粒銃子， 看會當予銃手刣人較慢一屑仔無。連這種「改革」mā真歹通過。

2月14，Florida州ê Stoneman Douglas中學發生慘案，一个19歲ê前學生涉嫌攑半自動長銃進入校園彈死17个人。事件引起全國性ê中學生示威，要求加強銃管制。

CNN電視台佇事發ê縣舉辦一場「公會堂」（Town  Hall）討論會，慘案ê存活者，佮死難者ê家屬當面質問政治人物。Florida州ê聯邦參議員，兩年前bat參加共和黨總統初選ê Marco Rubio，是徛佇維護持銃自由ê一爿。佇會中伊予一个學生直直追問，敢會拒絕全國長銃協會（National Rifle Association）ê獻金，伊攏毋答應。這个協會是真有夠力ê利益團體。毋過當伊講出贊成修法共買長銃ê年齡限制提懸，隨得著熱烈ê噗仔聲。

聯邦法律規定，會當買手銃ê上低年歲是21歲，毋過長銃，包括半自動銃，煞是18歲就會使買。這是銃管制ê一个中心爭點，甚至Donald Trump總統這幾工mā表態傾向修法，提懸到21歲。毋過全國長銃協會隨表示反對，講按呢「會剝奪18歲至20歲ê人受憲法保障ê自衛權利」。

另外有一个議題是「撞射銃托」（bump stock），這是一種內底有鬥弓仔ê銃托，若是共半自動銃ê一般銃托換做這種，伊會利用開銃ê反作用力，連紲發射，速度緊kah欲倚機關銃。舊年10月佇Las Vegas彈死58个人了後自殺ê兇手有使用這種家私，驚動社會。撞射銃托並無用佇這改ê Florida案件內底，毋過Trump已經佇事後指示司法部研究禁止。

銃子篋仔方面，現此時聯邦佮大部份ê州攏無法律限制銃子ê數量，有民主黨ê參議員提案欲限制佇10發以內，毋過報導講，看起來真困難。

有關買銃ê人ê背景檢查，在來mā是重要ê議題，毋過目前有希望修法通過ê，只是加強聯邦佮各州資料ê流通佮更新，並毋是共會當買銃ê條件改予較嚴。