【世界台】對情報界歹聲嗽 Trump治國引煩惱

Donald Trump未曾未就任美國總統，就對情報機關真歹聲嗽。主要是伊對露西亞真友善，毋接受人講後者威脅美國ê國家安全。 專家警告，Trump對情報界無信任甚至侮辱，將來會出代誌。

頂禮拜，媒體報出來，講四位情報首長共現任佮候任總統做簡報的時，指出有消息講露西亞掌握不利Trump ê資料，包括伊幾冬前去Moscow，蹛佇飯店ê時叫妓女，予人偷翕起來。遮ê資料將來有可能予露西亞利用，來迫Trump聽話。

Trump佮露西亞攏隨否認。Trump真受氣，講情報機關共這款譀古ê假消息漏洩出去，是見笑代，做法袂輸Nazi德國。

進前情報機關講露西亞佇美國總統選戰期間侵入美國ê電腦系統，幫助Trump ê選情，Trump mā批評無影，講是欲共伊創空ê政治動作。伊這擺才講相信露西亞有做。

前國務院反恐協調官Daniel Benjamin發表文章講，美國ê情報界一向真中立、無黨派性。總統指控in政治化，是真害ê侮辱。總統絕對需要情報機關，若是無信任，情報人員欲按怎做工課？敢講總統無佮意ê情報就莫報告，較免予伊修理？

反倒轉講，Trump 總是會拄著愛照情報機關提供ê資訊，來決定軍事行動，伊若按呢拍歹in ê名聲，到彼陣，欲按怎koh叫民眾相信這个決定是正確ê？

Benjamin講，士氣低ê情報機關，人員袂拚性命做，gâu人甘願去民間的情報公司趁錢，漏洩情報捒責任ê事件mā會捷發生。

保守派評論家Jennifer Rubin講，其實佇Trump家己提名ê相關首長人選中間，倚露西亞、批判情報界，並毋是主流。佇前幾工ê國會聽證會，預定ê國務卿Rex Tillerson、國防部長James Mattis佮中央情報局（CIA）局長Mike Pompeo攏指出露西亞是威脅。Mattis佮Pompeo並且表示真信任美國ê情報人員。

Rubin講，這兩方面的意見佮Trump上倚，甚至影響Trump上大ê，是準國家安全顧問Michael Flynn，伊對情報界有私怨，伊過激ê立場若是無調整，未來政府內底會一直發生衝突。

【世界台】Facebook專頁